ملتان میں پرل کانٹی نینٹل کا افتتاح ،تعمیر کاکام اٹھارہ ماہ میں مکمل ہو گا : حسیب گردیزی ، اخلاق احمد

ملتان : (اے پی پی):ملتان میں پہلے فائیوسٹارہوٹل پرل کانٹی نینٹل کی تعمیر کاکام تیزی سے جاری ہے اوریہ ہوٹل اگلے 18ماہ میں مکمل ہوجائے گا۔ان خیالات کااظہارمنگل کی شپ پرل کانٹی نینٹل ملتان کی افتتاحی تقریب میں ہوٹل کے چیف آپریٹنگ آفیسر حسیب گردیزی نے خطاب کے دوران کیا۔
انہوں نے بتایاکہ عسکریہ بائی پاس روڈ پرزیرتعمیریہ ہوٹل 45ایکڑپرمحیط ہے اوراس کی تعمیر مکمل ہونے کے بعد ملتان ایک نئے عہد میں داخل ہوجائے گا۔انہوں نے کہاکہ پرل کانٹی نینٹل ہوٹل اس وقت لاہور،کراچی ،گوادر،بھوربن،پشاور سمیت پاکستان کے 8شہروں میں کام کررہاہے ۔یہ پاکستان کے پانچ ستارہ ہوٹلوں میں نمایاں مقام رکھتاہے ۔انہوں نے کہاکہ ملتان میں اس ہوٹل کی تعمیر 2010ءمیں شروع ہوئی تھی اوراس کی زمین کے انتخاب اورتعمیر میں اس وقت کے وزیراعظم یوسف رضا گیلانی نے اہم کرداراداکیاتھااوران کی خواہش پرہی ہاشوانی گروپ نے ملتان میں ہوٹل کی تعمیرپرآمادگی ظاہر کی۔
یہ ہوٹل سٹارمارکیٹنگ کے زیراہتمام تعمیر کیاجارہاہے ۔سٹار مارکیٹنگ کے منیجنگ ڈائریکٹراخلاق احمد نے اس موقع پرخطاب کرتے ہوئے کہاکہ پی سی ہوٹل آنے والے برسوں کے دوران تاریخی شہرملتان میں کھیلوں اورعالمی معیار کے تفریحی پروگراموں کے انعقاد میں معاون ثابت ہوگا۔انہوں نے کہاکہ آج کل پاک انگلینڈ کرکٹ میچ کی وجہ سے شہرمیں ٹریفک کے جوبھی مسائل ہیں اس کی بنیادی وجہ یہ ہے کہ دونوں ٹیمیں شہرکے اندر قیام پذیرہیں ۔پرل کانٹی نینٹل کی تعمیر مکمل ہونے کے بعد یہ مسائل ختم ہوجائیں گے ،ٹیمیں اسی ہوٹل میں قیام کریں گی اوریہیں سے سٹڈیم روانہ ہوجائیں گی ۔