چنئی:ورلڈکپ میں آج پاکستان جنوبی افریقا کے خلاف ٹورنامنٹ میں اپنا چھٹا میچ کھیلے گا لیکن چنئی میں آج تیز ہواؤں کے ساتھ بارش بھی ہوئی ہے۔
بھارتی محکمہ موسمیات نے آج چنئی میں بارش کی پیشگوئی کر رکھی ہے، آج صبح تیز ہواؤں کے ساتھ بارش ریکارڈ کی گئی، اب چنئی میں بارش تھم چکی ہے اور تھوڑی سی دھوپ بھی نکل آئی ہے لیکن بادل بدستور موجود ہیں۔
چنئی میں موجود نمائندہ جیو نیوز کا کہنا ہے کہ اگر مزید بارش ہوئی تو ہو سکتا ہے کہ آج کا میچ تھوڑا تاخیر سے شروع ہو لیکن بھارتی محکمہ موسمیات کی جانب سے آج تیز یا موسلا دھار بارش کی کوئی پیشگوئی نہیں کی گئی۔
آج پاکستان اور جنوبی افریقا کے درمیان چنئی کے چدم برم اسٹیڈیم میں میچ شیڈول ہے، جنوبی افریقا کی ٹیم پوائنٹس ٹیبل پر دوسرے نمبر پر ہے جبکہ پاکستانی ٹیم 3 مسلسل شکستوں کے بعد چھٹے نمبر پر موجود ہے۔
(بشکریہ: جیو نیوز)
