صبا قمر کی ” ہندی میڈم ” چل نکلی : پندرہ روز میں پچاس کروڑکا بزنس

ممبئی : بھارتی روزنامہ انڈین ایکسپریس کے مطابق بالی ووڈ کی فلم "ہندی میڈیم” نے ہفتہ کے روز پچاس کروڑ کے بزنس کا سنگ میل عبور کر لیا ہے۔ فلم میں پاکستان کی معروف اداکارہ صبا قمر کو بھارتی ہیرو عرفان خان کے ہمراہ کاسٹ کیا گیا ہے۔
بھارتی اداکار عرفان خان کا کہنا ہے کہ "ہندی میڈیم” کے لئے ضروری تھا کہ ہیروئن خوبصورت بھی ہو اور خوش مزاج بھی۔ صبا قمر میں یہ خصوصیات فلم کی کامیابی کا سبب بنیں۔ یہی نہیں صبا ہندی بھی بڑی روانی سے بولتی ہیں جو ایک غیر معمولی بات ہے۔ اداکارہ صبا قمر زمان کی پہلی بھارتی فلم ” ہندی میڈم ” ریلیز ہو چکی ہے۔ اسے بھارت میں 1100 سے زائد سکرینز پر ریلیز کیا گیا ہے جبکہ پاکستان اور دوسرے ملکوں میں بھی اس کی نمائش ہو رہی ہے۔ فلم میں جہاں عرفان خان اور صبا قمر کی اداکاری نے سب کو متاثر کیا ہے تو وہاں باکس آفس پر بھی فلم اچھا بزنس کر رہی ہے۔ فلم نے ریلیز کے بعد پندرہ روز میں ہی پچاس کروڑ سے زائد کا بزنس کر لیا ہے۔ فلم کا سکرپٹ بھی اچھا ہے اور کہانی مربوط انداز میں آگے بڑھتی ہے۔ صبا قمر نے بھی اپنی اداکاری سے خود کو ورسٹائل اداکارہ ثابت کیا ہے۔” ہندی میڈم ” کی کہانی چاندنی چوک نئی دہلی کے ایک جوڑے (صبا قمر اور عرفان خان ) کے گرد گھومتی ہے جو اپنی کلاس تبدیل کرنے کی کوشش میں ہوتے ہیں جس میں وہ بالآخر کامیاب بھی ہو جاتے ہیں۔وہ نہیں چاہتے کہ ان کی بچی ان کی طرح ایک عام سرکاری سکول میں پڑھے کیونکہ ان کے والدین اس سے زیادہ افورڈ نہیں کر سکتے تھے۔ اب ان کے پاس وسائل ہوتے ہیں۔فلم میں صبا قمر نے مٹو اور عرفان خان نے راج کا کردار نبھایا ہے۔
متوسط گھرانوں کے اونچے خواب، یہی فلم کی کامیابی کی دلیل سمجھی جا رہی ہے۔

(بشکریہ:نیوز فلیش)