پنجاب میں مارکیٹیں ، پارکس اور ہوٹل تین روز کے لئے بند

لاہور : صوبہ بھر میں کورونا وائرس کے خلاف اقدامات کو موثر بنانے کیلئے وزیراعلیٰ پنجاب سردار عثمان بزدار نے اہم فیصلہ کرتے ہوئے پنجاب میں مارکیٹیں ، پارکس اور ہوٹل تین روز کے لئے بند کرنے اور وزیر اعلیٰ بلوچستان جام کمال نے دس روز کے لاک ڈاؤن کا اعلان کیا ہے ۔
مارکیٹیں، پارکس اور عوامی اجتماعات کے مقامات آج رات 9 بجے سے منگل کی صبح 9 بجے تک بند رکھے جائیں گے ۔ دودھ، دہی کی دکانیں، مٹن، چکن شاپس، پٹرول پمپس، فارمیسی، بیکریز، فروٹ اور سبزی منڈیاں اور شاپس کھلی رہیں گی، وزیر اعلیٰ عثمان بزدار نے کہا ہوٹلز اور ریسٹورنٹس سے ٹیک اوے سروس جاری رہے گی۔
تمام محکموں کو ہدایات جاری کی جا رہی ہیں کسی کو ناجائز تنگ یا پریشان نہ کیا جائے۔انہوں نے کہا یہ لاک ڈاؤن نہیں، سماجی فاصلے پیدا کرنے کا اہتمام کر رہے ہیں۔وزیراعلیٰ عثمان بزدار نے عوام سے اپیل کی کہ ویک اینڈ گزارنے کیلئے گھروں میں رہا جائے، بلاضرورت باہر نہ نکلیں ۔
انہوں نے کہا سماجی فاصلوں کیلئے سٹینڈرڈ ایس او پیز بنائے جا رہے ہیں۔رہائش گاہ پر قرنطینہ کیلئے وفاقی حکومت کی مشاورت سے ایس او پیز طے کر رہے ہیں۔ تعلیمی ادارے بند کرنے پر پارکس، تفریحی مقامات اور مارکیٹوں وغیرہ میں رش بڑھنے سے فیصلہ کرنا پڑا۔پنجاب بھر میں ٹرانسپورٹ بند نہیں کی جائے گی، تاہم عوام غیر ضروری طور پر سفر سے گریز کریں۔
وزیراعلیٰ نے کہا محکمہ صنعت صوبہ میں اشیائے ضروریہ کی فراہمی یقینی بنانے کا اہتمام کرے سماجی فاصلے برقرار رکھنے کیلئے صرف عوامی اجتماع کے ممکنہ مقامات بند رکھے جائیں گے۔انہوں نے کہا کورونا ایمرجنسی آرڈیننس منگل کو کابینہ کے اجلاس میں منظوری کیلئے پیش کیا جائے گا۔ وزیر خزانہ منگل کو کانٹی جینسی پلان بھی پیش کریں گے۔
صاحب حیثیت مریضوں کیلئے بڑے نجی ہسپتالوں میں آئسولیشن/قرطینہ کی سہولت فراہم کی جائے گی۔عثمان بزدار نے کہا الحمداللہ! پنجاب میں صورتحال کنٹرول میں ہے، کڑی مانیٹرنگ کی جا رہی ہے۔
وزیراعلیٰ کو بریفنگ میں بتایا گیا کہ پنجاب بھر میں کورونا کے 137 مریض ہیں۔
ڈیرہ غازی خان قرنطینہ میں 106، لاہور 20، گوجرانوالہ 4، گجرات 3، جہلم 2، راولپنڈی اور ملتان میں ایک ایک مریض ہے۔صوبہ بھر میں کورونا مریضوں کا علاج کرنے والے ڈاکٹروں اور سٹاف کیلئے 24 ہزار سے زائد گاؤن موجود ہیں۔
صوبہ بھر میں 7 لاکھ 60 ہزار گلوز، 9 لاکھ 44ہزار سرجیکل ماسک، 9 لاکھ 20 ہزار این 95 ماسک میسر ہیں۔طبی عملے کیلئے 5 ہزار گاگلز، 44 ہزار شو کور اور 40 ہزار سینی ٹائزر کا سٹاک موجود ہے۔ کورونا کے علاج میں معاونت کیلئے چین کے ڈاکٹرز بھی آئیں گے۔