ملتان سمیت جنوبی پنجاب کے مختلف شہروں میں بارش : این ڈی ایم اے نے الرٹ جاری کر دیا

ملتان سمیت جنوبی پنجاب کے سیلاب زدہ علاقوں میں اتوار کی صبح بارش شروع ہوگئی جو دس ستمبر تک جاری رہے گی :
دوسری جانب این ڈی ایم اے کے نیشنل ایمر جنسیز آپریشن سینٹر نے جنوبی پنجاب کے متعدد علاقوں میں گرج چمک اور تیز ہواؤں کے ساتھ بارشوں کی پیش گوئی کا الرٹ جاری کر دیا ہے۔
ادارے کے مطابق آئندہ 24 سے 48 گھنٹوں کے دوران پنجاب کے شہر بہاولپور، بہاولنگر، احمدپور، لیاقت پور، ظاہر پیر، راجن پور، خان پور، مظفرگڑھ، ڈی جی خان، رحیم یار خان اور صادق آباد میں شدید بارش متوقع ہے۔
الرٹ کے مطابق اس دوران بارشوں کے ساتھ ساتھ طوفانی ہوائیں وقفے وقفے سے چلیں گی اور شدید بارش سے پہاڑی ندی نالے بپھرنے اور لینڈ سلائیڈنگ کا خطرہ موجود ہے۔
ادارے نے انتباہ جاری کیا ہے کہ اس دوران شہری علاقوں میں سیلابی صورتحال جبکہ نشیبی علاقے زیر آب آنے کا خدشہ ہے جبکہ تیز ہوائیں اور طوفان کمزور درخت گرانے اور بجلی کا نظام متاثر کرنے کا باعث بن سکتے ہیں۔
ادارے کا کہنا ہے کہ بارش اور گردوغبار سے حد نگاہ متاثر ہونے پر ٹریفک حادثات کا خدشہ ہے لہذا عوام بارش کے دوران غیر ضروری سفر سے اجتناب کریں، درختوں اور کمزور ڈھانچوں سے دور رہیں اور گاڑیوں کو محفوظ مقامات پر کھڑا کریں۔
( بی بی ی )