این اے 148ملتان کاضمنی الیکشن ،پولنگ جاری،یوسف رضاگیلانی کے بیٹے علی قاسم گیلانی اور بیرسٹرتیمور ملک مدمقابل

ملتان : حلقہ این اے 148ملتان ون کے ضمنی الیکشن میں پولنگ کا عمل پرامن طریقے سے جاری ہے ۔پولنگ کاسلسلہ صبح 8بجے شروع ہوا اورکسی وقفے کے بغیر شام 5بجے تک جاری رہے گا۔حلقے میں 4لاکھ 44ہزار 241ووٹرزہیں جن میں مرد ووٹروں کی تعداد 2لاکھ 33ہزار 634جبکہ خواتین ووٹروں کی تعداد 2لاکھ 10ہزار 607ہے ۔حلقے میں 275پولنگ سٹیشن قائم کئے گئے ہیں جن میں سے 69پولنگ سٹیشنوں کوحساس قراردیاگیاہے ۔ضمنی الیکشن میں پاکستان پیپلزپارٹی ،سنی اتحاد کونسل ،جماعت اسلامی ،تحریک لبیک کے امیدواروں کے علاوہ 8آزاد امیدواربھی میدان میں ہیں جبکہ مسلم لیگ ن پیپلزپارٹی کے حق میں اپنا امیدوار میدان میں نہیں لائی ۔پاکستان پیپلزپارٹی کی جانب سے چیئرمین سینیٹ سید یوسف رضاگیلانی کے صاحبزادے سید علی قاسم گیلانی میدان میں ہیں جبکہ سنی اتحاد کونسل کے امیدوار بیرسٹرتیمورالطاف ملک ان کے مدمقابل ہیں ۔ضمنی الیکشن میں امن وامان برقراررکھنے کے لئے سیکیورٹی کے سخت انتظامات کئے گئے ہیں ۔واضح ہو کہ نشست چیئرمین سینیٹ سید یوسف رضاگیلانی سینیٹر منتخب ہونے کے بعد خالی کی تھی ۔8فروری کے عام انتخابات میں بیرسٹرتیمورملک کو یوسف رضاگیلانی کے ہاتھوں 104ووٹوں سے شکست ہوئی تھی ۔