گجرات:اینٹی نارکوٹکس فورس (اے این ایف) نے گجرات ریلوے اسٹیشن پر کارروائی کے دوران جعفر ایکسپریس کے عملے کے 2 ارکان کے قبضے سے منشیات برآمد کرلی۔
ترجمان اے این ایف کے مطابق ٹرین کے ذریعے منشیات اسمگلنگ کی انٹیلی جنس اطلاعات موصول ہوئی تھیں جس کے نتیجے میں منصوبہ بندی سے راولپنڈی، پشاور، لاہور، کراچی اور کوئٹہ سمیت تمام بڑے جنکشنز پر ٹرینوں کو چیک کیا گیا، اس دوران جعفر ایکسپریس میں گجرات جنکشن کے مقام پر بھی چیکنگ کی گئی۔
ترجمان کے مطابق دوران کارروائی جعفر ایکسپریس کے گارڈ انچارج اور اسسٹنٹ ایگزامینر الیکٹرک کی تلاشی لی گئی جن کی سرکاری پیٹی سے 4 کلو چرس اور 2 کلو افیون برآمد کی گئی ہے۔
ترجمان نے بتایا کہ ملزمان منشیات راولپنڈی سے جیکب آباد اسمگل کرنے کی کوشش کررہے تھے، واقعےکے بعد تمام بڑے جنکشنز اور ٹرینوں کی نگرانی مزید سخت کر دی گئی ہے۔
اے این ایف ترجمان کا بتانا ہےکہ دونوں ملزمان راولپنڈی کے رہائشی ہیں اور ان کے خلاف مقدمہ درج کر لیا گیا ہے۔
(بشکریہ: جیو نیوز)
