لاہور قلندرز قلندز سے گونج اٹھا : کراچی کنگز کو شکست کے ونگز ۔۔ عمران عثمانی

لاہور : قذافی سٹیڈیم لاہور میں بین ڈنک نے 40 گیندوں پر 99 رنز کی برق رفتار اننگز کھیل کر قلندرز کو اہم کامیابی دلادی۔لاہور قلندرز ،قلندرز سے گونج اٹھا۔ اس فتح سے قلندرز فائنل 4 کی ریس میں بدستور شامل ہے۔
قلندرز نے بین ڈنک اور سہیل اختر کی جارحانہ بلے بازی کی بدولت 188 رنز کا ہدف آخری اوور کی پہلی گیند پر حاصل کرلیا۔کراچی کنگز کے اوپنر شرجیل خان ایک بار پھرحریف باؤلرزپر اپنی دھاک بٹھانے میں ناکام رہے۔ وہ 5 رنز بناکر آؤٹ ہوئے تو انگلینڈ سے تعلق رکھنے والے ایلکس ہیلز نے 48 گیندوں پر 80 رنز بناکر مدد دی۔بابراعظم38 اور چیڈوک والٹن 45 رنز بناکر آؤٹ ہوئے۔کراچی کنگز نے مقررہ 20اوورز میں 5وکٹوں کے نقصان پر 187 رنز بنائے۔ لاہور قلندرز کے معاذ خان نے دو اورسلمان ارشاد نے ایک وکٹ حاصل کی۔
مطلوبہ ہدف کے تعاقب میں لاہور قلندرز کا ٹاپ آرڈر ایک بار پھرمیزبان ٹیم کو مستحکم آغاز فراہم کرنے میں ناکام رہا۔ فخر زمان صفر اور محمد حفیظ 16 رنزبناکر آؤٹ ہوئے۔8.2 اوورز میں 50 رنز پر ابتدائی 2وکٹیں گنوانے کے بعد کپتان سہیل اخترنے بین ڈنک کے ہمراہ جارحانہ انداز اپنایا۔ بین ڈنک نے نوجوان اسپنر عمر خان کو 2 اوورز میں 4چھکے لگانے کے بعد تجربہ کار سپنر عماد وسیم کو ایک اوور میں 3 چھکے اور چوکا جڑ کر میچ میں سنسنی پھیلا دی۔دونوں کھلاڑیوں نے 65 گیندوں پر 140 رنز کی ناقابل شکست شراکت قائم کرکے میچ کا پانسہ پلٹ دیا۔ بین ڈنک نے 40گیندوں پر 99 اور سہیل اختر نے 46 گیندوں پر 68 رنز کی دھواں دھار ناقابل شکست اننگز کھیلیں۔ پی ایس ایل تاریخ میں یہ تیسری وکٹ کی سب سے بہترین پارٹنرشپ ہے۔میچ میں 12 چھکوں اور 3چوکوں کی مد د سے 99رنز کی ناقابل شکست اننگز کھیلنے پر بین ڈنک کو مین آف دی میچ کا ایوارڈ دیا گیا۔