بنگلہ دیش کرکٹ ٹیم کے دورہ پاکستان کے آخری مرحلے کے آغاز میں ابھی پورا ایک ماہ باقی ہے لیکن بھارتی بورڈ کے زیر اثر ہر مرتبہ دورہ پاکستان کے حوالے سے بنگلہ دیش کرکٹ بورڈ ایسی حکمت عملی اختیار کرتا ہے کہ جس سے پڑوسی ملک کی خوشنودی ملے اور ساتھ میں پاکستان کے حوالے سے منفی پروپیگنڈے کو تقویت ملے.ٹیم نے اب 3 اپریل کو کراچی میں ون ڈے اور 5 اپریل سے ٹیسٹ میچ کھیلنا ہے جس میں ابھی کافی وقت پڑا ہے مگر پھر وہی بات کہ روز اول سے دورے پر شکوک وشبہات پیدا کرنے والا بورڈ اس مرتبہ بھی موقع کی مناسبت سے بات کرگیا.بنگلہ دیشی بورڈ کے ترجمان کا کہنا ہے کہ پاکستان کے صوبہ سندھ میں کورونا وائرس کی وجہ سے سکولز کا بند ہونا بڑی بات ہے اسکا مطلب ہے کہ وہاں حالات سنجیدہ ہیں.ہمارے لیے کرکٹرز کی زندگی اہم ہے. ہم پی سی بی سے رابطے میں ہیں اور مسلسل رہیں گے.ابھی خاصا وقت باقی ہے اس لئے فی الوقت دورے کی منسوخی کی بات نہیں کر رہے.ایک ایسے وقت میں کہ جب دنیا کے اکثر ممالک میں اس حوالے سے بہت کچھ رپورٹ ہورہا ہےاس کے باوجود انگلینڈ کرکٹ ٹیم سری لنکا کا دورہ کر رہی ہے. آسٹریلیا کی ٹیم جنوبی افریقہ اور زمبابوے ٹیم بنگلہ دیش میں موجود ہے.پاکستان میں پی ایس ایل کے مقابلے جاری ہیں جس میں کرکٹ کھیلنے والے قریب تمام ممالک کے پلیئرز موجود ہیں اور تو اور بھارت پروٹیز کی میزبانی کی تیاری کر رہا ہےجہاں اگلے ہفتے کے آخر میں ون ڈے سیریز ہونی ہےایسے حالات میں دنیا کا کوئی ملک اپنی طے شدہ سیریز پر کوئی بات نہیں کر رہا اور ایک بنگلہ دیش ہے جو دورے سے بھی ایک ماہ قبل ایسی غیر ذمہ دارانہ گفتگو کرکے کچھ خاص مقاصد کے حصول میں کوشاں ہے .امید ہے کہ پاکستان کرکٹ بورڈ اس حوالے سے موثر حکمت عملی اختیار کرےگا.
