ملتان۔ (اے پی پی):عید کے موقع پر پردیسیوں نے اپنے گھروں کی راہ لی۔ جمعہ کے روز بس اڈوں اور ریلوے اسٹیشن پر مسافروں کا غیرمعمولی ہجوم دیکھنے میں آیا۔ عید کے موقع پر ٹرانسپورٹرز نے بھی عیدی جمع کی اور مسافروں سے منہ مانگے کرائے وصول کیے۔ ملتان سے لاہور کاجوکرایہ 1800روپے ہے وہ عید کے موقع پر 2200روپے جبکہ اسلام آبادراولپنڈی کاکرایہ 2100سے بڑھا کر2800روپے کردیاگیا۔ دیگر اضلاع کے کرایوں میں بھی چالیس فیصد تک اضافہ دیکھنے میں آیا۔ ضلعی انتظامیہ کے مطابق منہ مانگے کرایہ وصول کرنے والوں کے خلاف کارروائی کاسلسلہ جاری ہے۔ترجمان ضلعی حکومت نے بتایا کہ ہم نے گزشتہ دنوں میں بھی کئی ٹرانسپورٹرز کوجرمانے کیے اوران کے خلاف مقدمات بھی درج کیے گئے۔ کسی کو عوام کی جیبوں پر بوجھ ڈالنے کی اجازت نہیں دی جائے گی۔
