نئی دہلی : بھارت میں ابھرنے والی کاکروچ جنتا پارٹی (Cockroach Janta Party – CJP) نے بھارتیہ جنتا پارٹی کو پریشان کر دیا ہے ۔۔ یہ کوئی روایتی سیاسی جماعت نہیں ہے، بلکہ یہ بھارتی نوجوانوں (خاص طور پر جنریشن زی یا Gen Z) کی ایک انتہائی مقبول، طنزیہ اور ڈیجیٹل احتجاجی تحریک ہے۔ اس تحریک نے مئی 2026 میں دیکھتے ہی دیکھتے سوشل میڈیا پر تہلکہ مچا دیا اور اس کے فالوورز کی تعداد چند ہی دنوں میں لاکھوں سے بڑھ کر کروڑوں تک پہنچ گئی۔
اس منفرد اور انوکھی تحریک کا پس منظر بھارتی عدلیہ کے ایک ریمارکس سے جڑا ہے۔ 15 مئی 2026 کو بھارتی سپریم کورٹ کے چیف جسٹس سوریہ کانت نے ایک کیس کی سماعت کے دوران احتجاج کرنے والے یا سوشل میڈیا پر سرگرم چند بے روزگار نوجوانوں کے لیے مبینہ طور پر "کاکروچ” اور "معاشرے کے طفیلی (Parasites)” جیسے الفاظ استعمال کیے۔ اگرچہ بعد میں انہوں نے وضاحت جاری کی کہ ان کا مقصد عام نوجوان نہیں بلکہ جعلی ڈگریوں والے لوگ تھے، لیکن نوجوانوں میں غم و غصے کی لہر دوڑ چکی تھی۔
اس توہین آمیز تشبیہ کا جواب دینے کے لیے 30 سالہ نوجوان اور ڈیجیٹل اسٹریٹجسٹ ابھیجیت دیپکے (Abhijeet Dipke) نے اگلے ہی دن یعنی 16 مئی 2026 کو طنزیہ طور پر "کاکروچ جنتا پارٹی” کی بنیاد رکھ دی اور اسے "سست اور بے روزگار نوجوانوں کی آواز” قرار دیا۔
اس پارٹی نے روایتی سیاست کے برخلاف "میمز (Memes)”، ریلز اور طنز و مزاح کا سہارا لیا۔ اس کی مقبولیت کا اندازہ اس بات سے لگایا جا سکتا ہے کہ محض پانچ دنوں کے اندر اس کے انسٹاگرام اکاؤنٹ پر 1.5 کروڑ (15 ملین) سے زائد فالوورز ہو گئے، جس نے بھارت کی حکمران جماعت بی جے پی (BJP) کے آفیشل انسٹاگرام فالوورز کو بھی پیچھے چھوڑ دیا۔
