ملتان: اندرون شہر کے علاقے میں 3 منزلہ رہائشی عمارت گرنے سے 9 افراد جاں بحق ہوگئے۔
ڈپٹی کمشنر کے مطابق ملتان کے اندرون شہر کے علاقے محلہ جوادیہ میں رہائشی عمارت صبح 4 بجےاپنی مخدوش حالت کے باعث گرگئی۔
ڈپٹی کمشنر نے بتایا کہ عمارت کا کچھ ملبہ اس کے دائیں بائیں واقع مکانات پر گرا جس کے نتیجے میں جاں بحق اور زخمیوں کو نشتراسپتال منتقل کردیا گیا۔
ڈسٹرکٹ ایمرجنسی آفیسر کے مطابق عمارت گرنے سے 11 افراد دب گئے تھے، اب تمام افراد کو نکال کر ریسکیو آپریشن مکمل کرلیاگیا۔
ریسکیو آفیسر کا کہنا ہےکہ حادثہ کچن میں گیس لیکیج کی وجہ سے پیش آیا،سحری کے وقت خاتون نے آگ جلائی تو دھماکاہوا، دھماکے سے 3 منزلہ عمارت کا ایک حصہ ساتھ والےکچے مکان پرگرا، اس مکان میں موجود 5 بہن بھائی اور ان کے والدین جاں بحق ہوگئے۔
ریسکیو کے مطابق حادثے میں مجموعی طور پر 9 افراد جاں بحق اور 2 زخمی ہوئے۔
(بشکریہ: جیو نیوز)
