بنوں : پاکستان کے صوبہ خیبرپختونخوا کے ضلع بنوں میں مسلح افراد نے سب ڈویژن وزیر تھانہ اتمانزئی کی حدود روچہ چیک پوسٹ سے سات پولیس اہلکاروں کو اغوا کر لیا ہے۔پولیس کے مطابق دو درجن سے زائد حملہ آور تمام چھوٹا بڑا اسلحہ اور سامان بھی ساتھ اٹھا کر لے گئے ہیں۔
بی بی سی کے نامہ نگار عزیز اللہ کے مطابق مسلح افراد نے سب ڈویژن وزیر کے پہاڑی علاقے روچہ چیک پوسٹ کا گھیراؤ کیا اور پولیس اہلکاروں کو یرغمال بنا کر ساتھ لے گئے۔پولیس کے مطابق چار پولیس اہلکار موقع پر موجود نہ ہونے کی وجہ سے بچ گئے ہیں۔ڈی پی او بنوں ضیا الدین نے بی بی سی کو بتایا ہے کہ یہ سب ڈویژن پولیس کے اہلکار ہیں جنھیں مسلح افراد اغوا کرکے نامعلوم مقام کی جانب لے گئے ہیں۔ان کا کہنا تھا کہ اہلکاروں کی بازیابی کے لیے کوششیں جاری ہیں۔
