پی ٹی آئی ایم این ایز شیر افضل مروت، عامر ڈوگر اور دیگر آٹھ روزہ جسمانی ریمانڈ پر پولیس کے حوالے

منگل کے روز اسلام آباد میں انسداد دہشت گردی کی عدالت نے پاکستان تحریکِ انصاف کے اراکین قومی اسمبلی شیر افضل مروت، عامر ڈوگر، زین قریشی، نسیم شاہ، احمد چٹھہ و دیگر کو 8 روز کے جسمانی ریمانڈ پر پولیس کے حوالے کردیا ہے۔
اس سے قبل انسدادِ دہشتگردی کی عدالت کے جج ابو الحسنات ذوالقرنین نے پی ٹی آئی رہنما شعیب شاہین کو جوڈیشل ریمانڈ پر جیل بھیج دیا تھا جبکہ اسلام آباد پولیس نے پاکستان تحریکِ انصاف کے چیئرمین بیرسٹر گوہر علی خان کو مقدمے سے ڈسچارج کرتے ہوئے انھیں رہا کردیا ہے۔
خیال رہے کہ اتوار کے روز ہونے والے پی ٹی آئی کے جلسے کے دوران این او سی کی خلاف ورزی، پولیس پر پتھراؤ اور روٹ کی خلاف ورزی پر اب تک چھ مقدمے درج کیے جا چکے ہیں جن میں متعدد پی ٹی آئی رہنما نامزد ہیں۔
پیر کے روز پارلینمٹ ہاؤس کے باہر سے تحریک انصاف کے چیئرمین بیرسٹر گوہر اور ایم این اے شیر افضل مروت کی گرفتاری کے بعد اسلام آباد پولیس نے پارلیمنٹ کے کابینہ ڈویژن والے عقبی گیٹ سے تحریک انصاف کے رہنما شیخ وقاص اکرم اور زین قریشی کو بھی گرفتار کر کے تھانہ سیکرٹریٹ منتقل کر دیا تھا۔ اس کے علاوہ شعیب شاہین، ملک عامر ڈوگر، اویس جھاکھڑ، احمد چٹھہ، شاہ احد، نسیم علی شاہ، لطیف چترالی اور یوسف خٹک کو بھی حراست میں لے لیا گیا تھا۔