خضدار : بلوچستان کے ضلع خضدار سے نامعلوم مسلح افراد نے مزدوروں سمیت 18 افراد کو اغوا کرلیا ہے۔ سرکاری حکام کے مطابق اغوا کا یہ واقعہ ضلع کی تحصیل نال کےعلاقے بیسار اناری میں پیش آیا۔
تھانہ نال پولیس کے ایس ایچ او غلام مصطفیٰ نے بی بی سی کو بتایا کہ حملہ آوروں کی ایک بڑی تعداد گزشتہ شب اس علاقے میں سنگ مرمر کی ایک کان اور فیکٹری پر آئی۔
ان کا کہنا تھا کہ مسلح افراد وہاں سے 18 افراد اغوا کرکے لے گئے۔ مغویوں میں مائنز کے مالک کا بیٹا اور 17مزدور شامل ہیں۔
جس مائنز سے مزدوروں سمیت 18افراد کو اغوا کیا گیا وہ علاقے کی ایک قبائلی شخصیت کی ہے ۔ پولیس افسر کے مطابق مسلح افراد مائنز سے ایک لوڈر اور دو گاڑیاں بھی لے گئے۔
اغوا ہونے والے مزدوروں کا تعلق ضلع خضدار کے علاقوں نال اور وڈھ سے ہے۔ تاحال کسی نے اس واقعے کی ذمہ داری قبول نہیں کی ہے۔
گزشتہ سال کے آخر میں بھی نال کے علاقے میں ایک تعمیراتی کمپنی کے کیمپ پر حملہ کیا گیا تھا ۔ حملہ آور وہاں مشنری کو نذر آتش کرنے کے علاوہ ایک درجن سے زائد مزدوروں کو اغوا کرلیا تھا۔
ان مغوی مزدوروں کا تعلق سندھ سے تھا جن کو بعد میں چھوڑ دیا گیا تھا ۔ ضلع خضدار کا شمار بلوچستان کے ان علاقوں میں ہوتا ہے جو کہ شورش سے متاثر ہیں۔
خضدار کے دیگر علاقوں میں بھی سنگین بدامنی کے واقعات کے علاوہ تعمیراتی کمپنیوں سے کارکنوں کے اغوا کے واقعات پیش آتے رہے ہیں۔ تاہم سرکاری حکام کا کہنا ہے کہ صورتحال کی بہتری کے لیے سکیورٹی فورسز کے آپریشنز سمیت دیگر اقدامات جاری ہیں
