لاہور : معروف شاعر سید سلمان گیلانی انتقال کرگئے۔
اہل خانہ کے مطابق سید سلمان گیلانی طویل عرصے سے علیل اورشیخ زید اسپتال میں زیرعلاج تھے جہاں وہ آج انتقال کرگئے۔
سلمان گیلانی 74 برس کے تھے،دل اور جگر کے عارضہ میں مبتلا تھے۔
انہیں "شاعرِ ختمِ نبوت” اور "قائد جمعیت کے رفیق خاص” کہا جا رہا ہے۔سید سلمان گیلانی 1951 میں لاہور میں پیدا ہوئے اور زندگی بھر ادب، مذہب اور سماجی مسائل پر اپنا قلم استعمال کرتے رہے۔ ان کی کتاب "میری باتیں ہیں یاد رکھنے کی” بھی کافی مقبول رہی، جس میں ان کی یادداشتیں اور واقعات شامل ہیں۔
سید سلمان گیلانی نہ صرف پاکستان بلکہ بیرون ممالک میں بھی مشاعرے پڑھا کرتے تھے اور ختم نبوت اور نعت کے حوالے سے بھی جانے جاتے تھے ۔ سید سلمان گیلانی کی وفات پر ادبی حلقے سوگوار ہیں ۔ شعرا کرام ،سیاسی و سماجی شخصیات اور مذہبی حلقے بھی تعزیت کررہے ہیں ۔
سید سلمان گیلانی طویل عرصے سے علیل تھے اور شیخ زید ہسپتال میں زیر علاج تھے ۔سلمان گیلانی کے پسماندگان میں ایک بیٹا دو بیٹیاں ہیں ۔سلمان گیلانی مزاحیہ شاعری کے حوالے سے مقبول تھے ۔
دوسری جانب جمعیت علمائے اسلام کے سربراہ مولانا فضل الرحمان نے شاعرسیدسلمان گیلانی کی وفات پر افسوس کا اظہار کیا اور کہاکہ سید سلمان گیلانی بلندپایہ شاعر، باکمال نعت خواں اورعمدہ نثرنگارتھے۔
ان کا کہنا تھاکہ سلمان گیلانی مرحوم کے نعتیہ کلام سے لاکھوں لوگ مستفید ہوئے، سلمان گیلانی مرحوم ہمارے خانوادے کے ایک فرد کی حیثیت رکھتے تھے۔
