سپین میں مردہ خاتون کو طیارے میں سوار کروا دیا گیا

مالاگا : اسپین سے برطانیہ جانے والی ایک ایزی جیٹ کی پرواز اُس وقت شدید ہنگامے اور طویل تاخیر کا شکار ہوگئی جب ایک 89 سالہ خاتون کی موت کا واقعہ سامنے آیا۔
برطانوی خاندان نے مبینہ طور پر مردہ دادی کو وہیل چیئر پر بٹھا کر پرواز میں سوار کرا یا۔
مسافروں کے مطابق ایک برطانوی خاندان نے اپنی بزرگ رشتے دار کو وہیل چیئر پر بٹھا کر جہاز میں سوار کیا اور عملے کو بتایا کہ وہ بیمار ہیں اور سو رہی ہیں، تاہم بعد میں خاتون کو مردہ قرار دے دیا گیا۔
یہ واقعہ اسپین کے شہر مالاگا سے لندن کے گیٹ وِک ایئرپورٹ جانے والی پرواز میں پیش آیا، مسافروں کے مطابق جہاز ٹیک آف کے لیے رن وے کی جانب بڑھ چکا تھا کہ کیبن کریو کو خاتون کی حالت پر تشویش ہوئی۔
طیارے کو فوری طور پر واپس ٹرمینل لے جایا گیا، جہاں طبی عملے نے خاتون کو مردہ قرار دے دیا، اس واقعے کے باعث پرواز تقریباً 12 گھنٹے تاخیر کا شکار ہوئی۔
متعدد مسافروں نے سوشل میڈیا پر دعویٰ کیا کہ خاتون کی موت جہاز میں سوار ہونے سے پہلے ہی ہو چکی تھی، تاہم ایزی جیٹ نے ان الزامات کی تردید کی ہے۔
ایئر لائن کے مطابق خاتون کے پاس میڈیکل فِٹ ٹو فلائی سرٹیفکیٹ موجود تھا اور وہ بورڈنگ کے وقت زندہ تھیں۔
مسافر کے مطابق خاندان کے افراد بار بار عملے کو یقین دلاتے رہے کہ خاتون بالکل ٹھیک ہیں، حالانکہ ان کے بقول حقیقت اس کے برعکس تھی۔
( بشکریہ : جنگ نیوز )