زکریا یونیورسٹی ہراسانی کیس خانگی جھگڑا نکلا : خاتون پروفیسر سے خفیہ شادی کر رکھی تھی : ڈاکٹر احسان ، طلاق ہو چکی ہے ، خاتون

ملتان : بہاءالدین ز کریا یونیورسٹی ہراسانی کیس خانگی جھگڑا نکلا ۔۔ فارسٹری ڈیپارٹمنٹ کے سربراہ ڈاکٹر احسان قادر نے خاتون اسٹنٹ پروفیسر کو اپنی دوسری اہلیہ قرار دے دیا اور اڑھائی برس پہلے کا نکاح نامہ بھی سامنے آگیا ۔ دوسری طرف پولیس تھانہ ڈی ایچ اے نے ڈاکٹر احسان قادر کے خلاف مقدمہ درج کر لیا ہے
ڈاکٹر احسان قادر کے مطابق انہوں نے خاتون سے چھپ کر شادی کر رکھی تھی جبکہ خاتون کا پولیس کو بیان ہے کہ اسے ڈاکٹر احسان طلاق دے چکے ہیں اور انہوں نے اس کے بعد 25 ستمبر کو اپنے آفس میں جسمانی تشدد اور زیادتی کا نشانہ بنایا ۔ ان دونوں فریقین کے بیانات کے بعد معاملہ الجھ گیا ہے ۔ڈاکٹر احسان کے مطابق خاتون کی بھی دوسری شادی ہے ان کی اپنے پہلے شوہر سے علیحدگی ہو چکی تھی۔۔
اس سے پہلے کی خبروں میں بتایا گیا تھا کہ زکریا یونیورسٹی ملتان میں اسسٹنٹ پروفیسر کے ساتھ ہیڈ آف ڈیپارٹمنٹ نے ریپ کیا ہے ۔۔ اسسٹنٹ پروفیسر کی جانب سے ہراسانی اور زیادتی کے الزامات کے بعد ملزم پروفیسر احسان قادر کو شعبہ کی سربراہی سے ہٹا کر معطل کر دیا گیا۔
زکریا یونیوسٹی کے رجسٹرار کی جانب جاری کیے گئے پریس ریلیز میں کہا گیا تھا کہ فاریسٹری ڈیپارٹمنٹ کی خاتون ٹیچر کی جانب سے 30 ستمبر کو دوپہر ایک بجے کے قریب شکایت موصول ہونے پر 2 بجے ہراسمنٹ کمیٹی کا اجلاس طلب کیا گیا۔
ملزم پروفیسر نے شہر سے باہر ہونے کے باعث انکوائری میں شرکت سے معذرت کی۔ تاہم معاملے کی سنگینی دیکھتے ہوئے انتظامیہ نے ملزم پروفیسر کو شعبہ کی سربراہی سے ہٹا کر فوری معطل کر دیا۔