کوئٹہ ۔ گردو پیش نیوز ۔ کوئٹہ کے مختلف علاقوں میں پیٹرول کی قلت شدت اختیار کرگئی۔ شہر کے متعدد پیٹرول پمپس بند پڑے ہیں جبکہ کھلے پمپس پر گاڑیوں اور موٹرسائیکلوں کی لمبی قطاریں لگ گئیں۔نجی ٹی وی سما نیوز کے مطابق کوئٹہ میں گاڑی سواروں سے لے کر موٹرسائیکل چلانے والوں تک ہر کوئی ایندھن کے حصول کی جدوجہد میں مصروف ہے۔
شہری کہتے ہیں کہ شہر کے بیشتر پیٹرول پمپ رکاوٹیں کھڑی کرکے بند کردیے گئے ہیں، پیٹرول نہ ملنے سے سخت پریشانی ہے۔ پمپس مالکان کا مؤقف ہے کہ ایران اور اسرائیل میں جنگ اور ایران پر امریکی حملے کے بعد پیر ٹرولیم مصنوعات کی سپلائی میں کمی اور مانگ میں اضافہ ہوا ۔ جس کے باعث قلت نے جنم لیا۔
ادھر ترجمان حکومت بلوچستان شاہد رند کا کہنا ہے کہ کوئٹہ یا بلوچستان میں پیٹرول کا کوئی بحران نہیں۔ غیرقانونی ایرانی پیٹرول کی سمگلنگ کے خلاف کریک ڈاؤن جاری ہے۔ جس کی وجہ سے مصنوعی قلت کا تاثر دیا جارہا ہے۔
ڈان نیوز کی رپورٹ کے مطابق آئل اینڈ گیس ریگولیٹری اتھارٹی اوگرا نے بھی حکام اور پیٹرول کمپنیوں کو وارننگ دی ہے کہ وہ اگلے بیس روز کے لیے سٹاک کنٹرول کر لیں کہ پیٹرول کی سپلائی میں رکاوٹ پیدا ہو سکتی ہے ۔۔ واضح ہو کہ پاکستان میں جون کے مہینے میں دس لاکھ پچاس ہزار ٹن تیل اور ڈیزل کی کھپت ہے ۔ ملک بھر میں پیٹرول پمپوں کی تعداد 11000 ہزار ہے جہاں ڈیزل اور پیٹرول کی سپلائی ہوتی ہے ۔ اس کے علاوہ جے پی ون اور جے پی فور سول اور فوجی طیاروں کے لیے استعمال ہوتا ہے ۔ اس صورت حال میں ٹرینوں اور گڈز ٹرانسپورٹ کے ذریعے سامان کی ترسیل بھی رک سکتی ہے ۔۔
