ڈرونز کی تباہی کے بعد بھارتی فوج ایل او سی پر شہریوں کو نشانہ بنانے لگی، چھے افراد ہلاک : پاک فوج نے بٹالین ہیڈ کوارٹر تباہ کردیا

اسلام آباد : وہاڑی،پاکپتن اور اوکاڑہ میں اسرائیلی ساختہ 6 بھارتی ڈرون تباہ کر دئیے گئے ۔سکیورٹی ذرائع کا کہنا ہے کہ 6 میں سے 1 ڈرون کو وہاڑی ، 1 پاکپتن ، 4 ڈرونز کو اوکاڑہ میں تباہ کیا،اب تک دشمن کے کل 35 ڈرونز کو تباہ کیا جا چکا ہے۔ دوسری جانب بھارتی جارحیت کے نتیجے میں پاکستان کے زیر انتظام کشمیر میں حکام کا کہنا ہے کہ گذشتہ روز لائن آف کنٹرول اور اس سے ملحقہ علاقوں میں ہونے والی انڈین فائرنگ اور شیلنگ کے نتیجے میں کم از کم چھ افراد ہلاک جبکہ 29 زخمی ہوئے ہیں۔ہلاک اور زخمی ہونے والوں میں خواتین بھی شامل ہیں۔
پاکستان کے زیر انتظام کشمیر کی حکومت کی جانب سے جمعہ کی صبح جاری کردہ نقصانات کی تفصیلی رپورٹ میں بتایا گیا ہے کہ شیلنگ کے نتیجے میں دو مکانات کو جزوی نقصان بھی پہنچا ہے۔رپورٹ کے مطابق ہلاک ہونے والے چھ افراد کا تعلق کوٹلی (4)، بھمبر (1) اور باغ (1) سے ہے۔
ہلاک ہونے والوں میں دو خواتین بھی شامل ہیں۔ اس رپورٹ کے مطابق زخمی ہونے والے 29 افراد میں نو خواتین اور تین بچے بھی شامل ہیں۔ زخمی ہونے والوں کا تعلق کوٹلی، بھمبر، باغ، نیلم، پونجھ اور حویلی سے ہے۔
ڈی جی آئی ایس پی آر کے مطابق تمام ڈرونز مسلسل ریڈارپر مانیٹر کیے جا رہےتھے،جب بھی کوئی ڈرون آتا ہےتو وہ مسلسل ریڈار پردیکھاجارہاہوتا ہے، ہمارےائیرڈیفنس سسٹم میں اتنی صلاحیت ہےکہ چھوٹے ڈرون کو بھی ٹریک کرلیتا ہے۔ بھارتی فوج نے ہجیرہ، فارورڈ کہوٹہ اور کھوئی رٹہ میں سول آبادی کو نشانہ بنایا،بھارتی فوج کی بلااشتعال فائرنگ سے5 شہری شہید ، 7 زخمی ہو گئے۔
بھارتی فوج شہری آبادی پر بھاری ہتھیاروں کا استعمال کر رہی ہے، پاک فوج کی جوابی کارروائی میں بھارتی فوج کی توپیں خاموش ہیں۔آزاد کشمیر کے علاقے کھوئی رٹہ بنڈلی کوٹلی میں بھارتی گولہ باری سے ایک شہری شہید ہو گیا۔اسسٹنٹ کمشنر کھوئی رٹہ کے مطابق بھارتی فوج کی جانب سے رات بھر سول آبادی پر گولہ باری جاری رہی، بھارتی گولہ باری سے متعدد مکانات کو نقصان پہنچا جبکہ ایک شہری شہید بھی ہوا۔
بی بی سی کے مطابق بعض پاکستانی حکام نے دعویٰ کیا ہے کہ لائن آف کنٹرول پر فائرنگ میں درجنوں انڈین فوجی ہلاک ہوئے ہیں۔ تاہم اس حوالے سے اعداد و شمار کی تصدیق کرنا مشکل ہو رہا ہے۔رواں ہفتے کے اوائل میں پاکستان کے وزیر اطلاعات عطا اللہ تارڑ نے دعویٰ کیا کہ 40 سے 50 انڈین فوجی ہلاک ہوئے ہیں۔جب ہم نے اس حوالے سے پاکستان کے وزیر دفاع خواجہ آصف سے بات کی تو انھوں نے کہا کہ ان کا خیال ہے بدھ تک 25 انڈین فوجیوں کی ہلاکت ہوئی ہے۔خواجہ آصف نے تسلیم کیا کہ پاکستان کو بھی ’نقصان اٹھانا پڑا ہے‘ تاہم وزیر دفاع نے بتایا کہ ان کے پاس اس حوالے سے اعداد و شمار نہیں ہیں۔
ان کا دعویٰ ہے کہ انڈیا نے لڑائی شروع کی اور اس کے بعد انڈیا کے دو بریگیڈ ہیڈ کوارٹرز کو نشانہ بنایا گیا۔ دلی نے دونوں دعوؤں کی تردید کی ہے۔ بی بی سی آزادانہ طور پر ان دعوؤں کی تصدیق نہیں کرسکا۔انڈین وزارت دفاع نے بی بی سی کو بتایا کہ انڈین فوج کو ہونے والے نقصان سے متعلق کوئی اطلاعات موصول نہیں ہوئی ہیں۔اس سے قبل ایک پریس ریلیز میں انڈین فوج نے دعویٰ کیا تھا کہ اس نے انڈین دفاعی انفراسٹرکچر پر داغے گئے ڈرون اور میزائل حملے ناکام بنائے ہیں اور اس حملے میں کوئی نقصان نہیں ہوا۔