چوتھے ٹی ٹوئنٹی میں پاکستانی بیٹرز بُری طرح ناکام، نیوزی لینڈ نے 115 رنز کے بڑے مارجن سے ہرا دیا

چوتھے ٹی ٹوئنٹی میں کیویز نے 115 رنز سے پاکستان کو شکست دے کر پانچ میچز کی سیریز میں فیصلہ کن برتری حاصل کرلی۔
نیوزی لینڈ کی ٹیم نے مقررہ 20 اوورز میں 6 وکٹوں کے نقصان پر 220 رنز اسکور کیے، جواب میں پاکستان کی پوری ٹیم 16.2 اوورز میں 105 رنز پر آؤٹ ہوگئی۔
ماؤنٹ مینگنوئی میں کھیلے گئے میچ میں پاکستان کے کپتان سلمان علی آغا نے ٹاس جیت کر پہلے نیوزی لینڈ کو بیٹنگ کی دعوت دی۔
نیوزی لینڈ کی اننگز:
پہلی اننگز میں کیوی بیٹرز نے جارحانہ کھیل کا مظاہرہ کیا، میزبان ٹیم نے 3.5 اوورز میں ہی 50 رنز بنالیے تھے۔
پاکستان کی جانب سے حارث رؤف نے 3، ابرار احمد نے 2 اور عباس آفریدی نے 1 کھلاڑی کو آؤٹ کیا۔
پاکستانی اننگز:
دوسری اننگز میں محمد حارث نے 2، حسن نواز، سلمان علی آغا اور شاداب خان ایک ایک رن بناکر پویلین لوٹے، عرفان خان 24 رنز بناکر ہمت ہارگئے، خوشدل شاہ صرف 6 رنز بناسکے اور عباس آفریدی بھی ایک رن بناکر آؤٹ ہوگئے۔
پاکستان کی جانب سے عبدالصمد 44 رنز بناکر نمایاں رہے جب کہ شاہین شاہ آفریدی اور حارث رؤف نے 6،6 رنز بنائے۔
نیوزی لینڈ کی جانب سے جیکب ڈفی نے 4، زکرے فولکس نے 3جب کہ ول اورورکی، اش سوڈھی اور جیمز نیشم نے نے ایک ایک وکٹ حاصل کی۔
پاکستانی پلیئنگ الیون:
پاکستانی ٹیم میں محمد حارث، حسن نواز، سلمان علی آغا (کپتان)، محمد عرفان خان، شاداب خان، عبدالصمد، خوشدل شاہ، محمد عباس آفریدی، شاہین شاہ آفریدی، ابرار احمد اور حارث رؤف شامل تھے۔
5 ٹی ٹوئنٹی میچز کی سیریز میں میزبان نیوزی لینڈ کو تین ایک کی برتری حاصل ہوگئی اور یوں کیویز نے یہ سیریز جیت لی۔
نیوزی لینڈ نے پہلے دو میچز میں پاکستان کو شکست دی تھی جب کہ تیسرے میچ میں پاکستان نے نیوزی لینڈ کو 9 وکٹوں سے شکست دی۔ اس میچ میں 22 سالہ بیٹر حسن نواز نے دھواں دھار سنچری بناکر بابر اعظم کا ریکارڈ توڑا تھا۔
(بشکریہ:جیونیوز)