لاہور: وفاقی وزیر اطلاعات عطا تارڑ نے کہا ہےکہ 9 مئی کے بعض کرداروں کو سزا مل گئی اور اب مرکزی کردار کی باری ہے۔
لاہور میں اپنے حلقہ انتخاب گرین ٹاؤن میں لیگی کارکنوں سے خطاب کرتے ہوئے عطار تارڑ نے کہا کہ ہم انتشار اور تقسیم کی سیاست پر یقین نہیں رکھتے، سیاسی مذاکرات کے قائل ہیں اور مذاکرات کرنا بھی جانتے ہیں مگر ملک میں سیاسی دہشتگردی نہیں چل سکتی۔
9 مئی کے کارندوں اور مہروں کے بعد ماسٹر مائنڈ کو بھی سزا ملے گی، وزیر دفاع
انہوں نے کہا کہ 9مئی ناقابل معافی جرم ہے، ماسٹر مائنڈ کو بھی سزا ہوگی، سیاست کی آڑ میں ملک پر حملے کیے گئے، شہدا کی یادگاروں کو مسمار کیا گیا، ملکی دفاعی تنصیبات پر حملے کیےگئے، دفاعی نظام کو نقصان پہنچایاگیا، دشمن کا خواب پورا کرنے والے خاطر جمع رکھیں۔
عطا تارڑ کا کہنا تھا کہ سیاسی جماعتیں بعد میں پاکستان پہلے ہے، اختلافات سیاستدانوں سے کریں، شہدا کے ساتھ دشمنی کیوں کرتے ہیں؟
انہوں نے مزید کہا کہ نواز شریف کی جماعت نے ملک میں مہنگائی کم کی، معیشت کے تمام اعشاریے مثبت ہیں، مہنگائی مزید کم ہوگی، عوام کی مشکلات حل کریں گے۔
(بشکریہ:جیونیوز)
