عید کے دوسرے روز بھی قربانی کا سلسلہ جاری رہا : قصابوں کے دماغ ٹھکانے پر آ گئے

ملتان سمیت جنوبی پنجاب کے مختلف شہروں میں عید کے دوسرے روز بھی سنت ابرہیمی کی ادائیگی کے لیے جانوروں کی قربانی کاسلسلہ جاری رہا اور ایسے بہت سے لوگ جو پہلے روز قصابوں کے زیادہ ریٹس اور ان کی عدم دستیابی کے باعث جانور ذبح نہیں کراسکے تھے انہوں منگل کے روز جانوروں کی قربانی دی ۔ مختلف گلی محلوں میں گھروں کے باہر بڑے جانور قربان کیے گئے ۔دریں اثناء عید کے پہلے روز کے مقابلے میں قصابوں کے ریٹ بھی کم ہو گئے ۔ بڑے جانور کو ذبح کرنے کا جو ریٹ پہلے روز پندرہ سے بیس ہزار روپے تھا عید کے دوسرے روز کم ہو کر 10 ہزار روپے ہو گیا جب کہ بکرا دو سے تین ہزار روپے میں بھی ذبح کیا جا رہا ہے ۔ اب بھی بہت سے شہری تیسرے دن کا انتظار کر رہے ہیں ۔ ایسے ہی ایک نوجوان خالد حسین نے اے پی پی کو بتایا کہ وہ عید کے تیسرے روز کا انتظار کر رہے ہیں ۔ خالد نے کہا مجھے یقین ہے کل تک ان کے دماغ ٹھکانے پر آ جائیں گے ۔