ملتان (اے پی پی)23مارچ کو جن شخصیات کو صدارتی اعزازات سے نوازاگیا ان میں ملتان کے نامور ادیب، شاعر اورکالم نگار خالد مسعود خان بھی شامل ہیں۔ خالد مسعود خان کوشعر وادب کے شعبے میں ان کی خدمات کے اعتراف میں صدارتی اعزاز برائے حسن کارکردگی عطا کیاگیا۔انہوں نے گورنرپنجاب انجینئر بلیغ الرحمن سے یہ تمغہ وصول کیا۔ اتوار کے روزاے پی پی سے بات چیت کرتے ہوئے خالد مسعود خان نے کہاکہ مجھے خوشی ہے کہ میری زندگی میں ہی حکومتی سطح پر میری خدمات کا اعتراف کیاگیاجس پر میں خدا کا شکر بجالاتا ہوں۔
انہوں نے کہاکہ بلاشبہ یہ ایک اعزاز ہے اور مجھے اچھا لگا کہ میں نے یہ اعزاز خود وصول کیا وگرنہ تو بہت سے نامور لوگ ایسے ہیں جواس اعزاز کے مستحق بھی ہیں لیکن انہیں فراموش کردیا جاتا ہے۔ انہوں نے کہاکہ کل کی تقریب میں نامور گلوکار عنایت حسین بھٹی کی وفات کے 25سال بعد ان کے لیے ستارہ امتیاز کا اعلان کیاگیا جو ان کے پوتے نے آکر وصول کیا۔ایسے موقع پر لواحقین کوخوشی تو ہوتی ہے لیکن وہ آزردہ بھی ہوجاتے ہیں،ایسی خوشی زندگی میں ملناہی اچھالگتا ہے۔ مجھے یقین ہے کہ آنے والے دنوں میں ایسے اورلوگوں کی خدمات کا بھی اعتراف کیا جائے گا جواس اعزاز کے مستحق توہیں لیکن وہ ابھی پس منظرمیں ہیں۔
