ملتان : کنٹونمنٹ بورڈ ملتان کے انتخابات کالعدم قرار دینے کی درخواست پر لاہور ہائیکورٹ ملتان بینچ نے 27 ستمبر کو جواب طلب کر لیا ۔ ملتان کے شہری سید کاشف شبیر جعفری نے ایڈوکیٹ شیخ جمشید حیات کے توسط سے درخواست دائر کی تھی جس میں انتخابات کی قانونی حیثیت کو چیلنج کیا گیا ہے ۔ درخواست میں کہا گیا ہے کہ کنٹونمنٹ بورڈ ملتان کے حالیہ الیکشن میں کنٹونمنٹ ایکٹ 1929 کی دفعات کی خلاف ورزی ہوئی ہے، درخواست گزار کے مطابق ایکٹ کے تحت 50 ہزار کی آبادی والے کنٹونمنٹ میں صرف 2 وارڈ بنائے جا سکتے ہیں، کنٹونمنٹ بورڈ ملتان کی آ بادی 50 ہزار سے کم ہےلیکن اس میں 10 وارڈز بنائے گئے تھے ۔ درخواست گزار نے استدعا کی کہ کنٹونمنٹ الیکشن میں قوانین کی خلاف ورزی ہوئی ہے الیکشن کالعدم قرار دیے جائیں، منگل کے روز ہائیکورٹ ملتان بینچ کے جسٹس شان گل نے جیتنے والے تمام امیدواروں ، کنٹونمنٹ بورڈ اور الیکشن کمیشن کو نوٹس جاری کرتے ہوئے 27 ستمبر کو جواب طلب کر لیا