بھارتی جاسوس کلبھوشن کے خلاف ثبوت موجودہیں: وزیرخارجہ شاہ محمود

ملتان :وزیرخارجہ مخدوم شاہ محمودقریشی نے کہا ہے کہ پاکستان کے پاس بھارتی جاسوس کلبھوشن یادیو کے خلاف ثبوت موجودہیں اور وہ عالمی عدالت انصاف میں یہ مقدمہ موثر انداز میں پیش کر ے گا۔ انہوں نے امید ظاہر کی کہ پاکستان کو اس مقدمے میں کامیابی حاصل ہوگی۔ان خیالات کااظہار انہوںنے حلقہ این اے 156اور این اے 157کے عوام اور کارکنوںکے ساتھ عید ملن پارٹی کے موقع پر میڈیا سے بات چیت کرتے ہوئے کیا۔انہوں نے کہاکہ پاکستان کی خارجہ پالیسی گزشتہ ساڑھے چاربرسوں کے دوران بہتر نہیںہوسکی تاہم انہوں نے کہاکہ وہ ستمبر میں اقوام متحدہ کی جنرل اسمبلی میں جائیں گے اور پاکستان کانقطہ نظر دنیا کے سامنے موثر انداز میں پیش کریں گے۔وزیرخارجہ شاہ محمودقریشی نے مزید کہاکہ عالمی سطح کے مسائل عموماً پیچیدہ ہوتے ہیں اورا س بات کی ضرورت ہوتی ہے کہ دنیا کے سامنے ان کے بارے میں ملک کا نقطہ نظر تسلسل کے ساتھ پیش کیاجاتارہے۔انہوں نے کہاکہ صورت حال عموماً یکساں نہیں رہتی اور حالات تبدیل ہوتے رہتے ہیں۔انہوں نے یقین دلایا کہ پاکستان اپنا نقطہ نظر انتہائی موثرانداز میںپیش کرے گا۔اس سوال کے جواب میں کہ اقوام متحدہ اب کتنی موثر ہے ،وزیرخارجہ نے کہاکہ اگرچہ بعض لوگ اس تنظیم کے بارے میں مایوسی کا شکار ہیں تاہم یہ ایک اہم فورم ہے جس کی بہت اہمیت ہے۔تاہم انہوں نے کہاکہ لوگوںکو اس سلسلے میں ناامید نہیں ہونا چاہیے۔اسلامی سربراہ تنظیم (او آئی سی)کو مزید موثربنانے سے متعلق سوال کے جواب میں شاہ محمودقریشی نے کہا کہ اسلامی کانفرنس تنظیم بھی ایک اہم فورم ہے اور اسے مزید موثر بنایاجانا چاہیے۔ وزیرخارجہ نے کہاکہ توہین آمیزخاکوں کا معاملہ اس اہم فورم میں اٹھایا جانا چاہیے اور او آئی سی کو اس بارے میں عالمی برادری کو اپنی تشویش سے آگاہ کرناچاہیے۔افغانستان میں امن کے حوالے سے ایک سوال کا جواب دیتے ہوئے وزیرخارجہ شاہ محمودقریشی نے کہاکہ پاکستان اور افغانستان کے عوام نے بہت سی قربانیاں دی ہیں۔ دونوں ممالک کو مختلف چینلجوںاور مسائل کاسامنا ہے جسے وہ حل کرنا چاہتے ہیں۔وزیراعظم عمران خان کے قوم سے خطاب کے بارے میں سوال پرشاہ محمودقریشی نے کہاکہ وزیراعظم عمران خان عوام کے مسائل سے بخوبی آگاہ ہیں اور انہوں نے قوم سے خطاب میں لوگوں کے مسائل کی ترجمانی کی ہے۔شاہ محمودقریشی نے کہا کہ عوام کو چاہیے کہ وہ عمران خان کی مکمل حمایت جاری رکھیں تاکہ وہ معیشت کو درپیش چینلجوں سے نمٹ سکیں۔وزیرخارجہ نے کہاکہ مستقبل میں حکومت کو بہت سے مشکل اور اہم فیصلے کرنے ہیں اور عوام کو اس سلسلے میں نئی حکومت کا بھرپور ساتھ دینا چاہیے۔انہوں نے امید ظاہر کی کہ عمران خان عوام کو مایوس نہیں کریں گے۔پہلے 100روز کے دوران حکومت اپنی سمت عوام کے سامنے رکھ دے گی ۔انہوں نے مزید کہاکہ کرپٹ عناصر کوگرفت میں لانا اور ان کااحتساب کرنا بہت ضروری ہے۔انہیںسزا دیئے بغیر مختلف اداروں میںبہتری لانا مشکل ہے۔انہوں نے کہاکہ ماضی میں بلواسطہ ٹیکسوں کابوجھ عوام پر تھا تاہم وزیراعظم عمران خان کا وژن یہ ہے کہ امیر لوگوں کو ٹیکس کے دائر ے میں لایا جائے۔جنوبی پنجاب صوبے کے بارے میں سوال پر انہوں نے کہاکہ یہ خواب حقیقت کاروپ دھارے گا ۔اس مقصد کے لیے حکومت اپوزیشن کاتعاون حاصل کرے گی۔شاہ محمودقریشی نے کہاکہ پاکستان پیپلزپارٹی کے چیئرمین بلاول بھٹو زرداری اور قمرزمان کائرہ نے جنوبی پنجاب صوبے کے بارے میں مثبت بیانات دیئے ہیں۔شاہ محمودقریشی نے مزید بتایا کہ انہوں نے خارجہ سیکرٹری تہمینہ جنجوعہ سے بریفنگ لی ہے اور وزیراعظم عمران خان کو بھی تمام امورسے آگاہ کیا جائے گا۔