متحدہ عرب امارات کا اسرائیل سے سفارتی تعلقات منقطع کرنے کا اعلان

متحدہ عرب امارات (یو اے ای) نے اسرائیل سے سفارتی تعلقات منطقع کرنے کا اعلان کردیا۔
غیرملکی میڈیا رپورٹ کے مطابق، یو اے ای نے اسرائیل کے ساتھ تمام سفارتی رابطوں کو روک دیا ہے۔ یو اے ای نے اسرائیل سے تعلقات منقطع کرنے کا فیصلہ غزہ میں عالمی امدادی ادارے ورلڈ سینٹرل کچن کے 7 کارکنوں کے قتل کے بعد کیا ہے۔ ان کارکنوں کو چند روز قبل اسرائیل نے ٹارگٹ کرکے ہلاک کردیا تھا۔
میڈیا رپورٹ میں بتایا گیا ہے کہ اماراتی وزیر خارجہ عبداللہ بن زید آل نہیان نے اس واقعے پر اسرائیلی ہم منصب اسرائیل کاٹز کے ساتھ شدید غم وغصہ کا اظہار کیا ہے۔
علاوہ ازیں، اسرائیلی وزارت خارجہ کے حکام نے اماراتی سفیر سے اس مسئلے کو حل کرنے کے لیے ملاقات کی تاہم اماراتی سفیر نے اس مسئلے کو دونوں ملکوں کے درمیان تعلقات کے حوالے سے تاریک ترین دن قرار دیا ہے۔
واضح رہے کہ متحدہ عرب امارات اور اسرائیل کے درمیان تعلقات نارمل کرنے کے حوالے سے معاہدہ 2020 میں طے پایا تھا اور 2021 میں یو اے ای نے اسرائیل میں اپنے پہلے سفات خانے اور قونصل خانے کا افتتاح کیا تھا۔
خیال رہے کہ 7 اکتوبر کو شروع ہونے والی حماس اسرائیل جنگ کے بعد سے اب تک 9 ممالک نے اسرائیل سے سفارتی تعلقات منقطع کیے ہیں۔ ان ممالک میں اردن، بحرین، ترکیہ، کولمبیا، ہونڈورس، چلی، بیلیز، جنوبی افریقہ اور چاڈ شامل ہیں۔
غزہ میں 7 اکتوبر سے اب تک جاری اسرائیلی وحشیانہ حملوں میں شہید ہونے والے فلسطینیوں کی تعداد 33 ہزار سے تجاوز کرگئی ہے۔
(بشکریہ: وی نیوز)