کراچی: سندھ کابینہ نے آئی ایم ایف کی شرط پرزرعی انکم ٹیکس بل 2025 کی تحفظات کے ساتھ منظوری دے دی۔
ترجمان وزیر اعلیٰ سندھ کے مطابق زرعی انکم ٹیکس بل جنوری 2025 سے نافذ ہو گا۔
وزیراعلیٰ سندھ کے ترجمان کا کہنا ہے کہ صوبائی حکومت نےزرعی انکم ٹیکس میں لائیو اسٹاک کو شامل نہیں کیا۔
وزیر اعلیٰ مراد علی شاہ کا اس حوالے سے کہنا ہے کہزرعی انکم ٹیکس بورڈ آف ریونیوکے بجائے سندھ ریونیو بورڈ جمع کرے گا جبکہ قدرتی آفات کی صورت میں زرعی انکم ٹیکس میں ایڈجسٹمنٹ ہو گی۔
ترجمان وزیراعلیٰ سندھ نے بتایا کہ آباد اراضی چھپانے کی صورت میں جرمانہ لگایا جائے گا، چھوٹی کمپنیوں پر زرعی ٹیکس 20 فیصد اور بڑی کمپنیوں پر 28 فیصد لاگو ہو گا۔
20 کروڑ روپے سے 25کروڑ روپے تک زرعی آمدن پر 2 فیصد ٹیکس لگے گا، زرعی آمدنی 25 کروڑ سے 30 کروڑ روپے پر 3 فیصد ٹیکس لگے گا جبکہ 30کروڑ روپے سے 35 کروڑ روپے تک زرعی آمدن پر 4 فیصد ٹیکس لگے گا۔
ایگری کلچر انکم ٹیکس ایکٹ کے مطابق زرعی آمدنی 35 کروڑ روپے سے 40 کروڑ روپے تک 6 فیصد ٹیکس لگے گا، 40 کروڑ روپے سے 50 کروڑ روپے تک زرعی آمدن پر 8 فیصد ٹیکس لگے گا جبکہ زرعی آمدنی 50کروڑ روپے سے زائد ہونے پر 10 فیصد ایگریکلچر انکم ٹیکس لگے گا۔
ذرائع کا بتانا ہے کہ زرعی آمدنی 6 لاکھ سالانہ تک ہونے پر ٹیکس لاگو نہیں ہو گا، 6 لاکھ سے اوپر کی 12 لاکھ تک آمدنی پر 15 فیصد ٹیکس ہو گا جبکہ زیادہ آمدنی والے زمینداروں پر سپر ٹیکس نافذ کیا جائے گا۔
ایگریکلچر ٹیکس لگانے سے سبزیوں کی قیمتیں بڑھ جائیں گی، سندھ کابینہ کا تحفظات کا اظہار
وزیر اعلیٰ مراد علی شاہ کی زیر صدارت ہونے والے اجلاس میں سندھ کابینہ کے اراکین کا کہنا تھا آئی ایم ایف سے بات کرنے سے پہلے سندھ کو اعتماد میں لینا چاہیے تھا، وزیر اعلیٰ مراد علی شاہ کا کہنا تھا ملکی مفاد میں سندھ کابینہ زرعی ٹیکس کی منظوری دی رہی ہے، وفاقی حکومت سے دوبارہ بات کروں گا۔
سندھ کابینہ کا کہنا تھا ایگریکلچر انکم ٹیکس لگانے سے سبزیوں کی قیمتیں بڑھ جائیں گی جبکہ اراکین اسمبلی نے اس خدشے کا اظہار بھی کیا کہ زرعی ٹیکس لگنے سے گندم اور دیگر اجناس بھی مہنگی ہو جائیں گی۔
(بشکریہ:جیونیوز)
