شاہ محمود قریشی کی رہائی کا حکم ، شہر یار آفریدی کی اہلیہ اور 70 کارکنوں کی نظربندی بھی کالعدم

اسلام آباد : اسلام آباد ہائی کورٹ نے سابق وزیرخارجہ و رہنما پاکستان تحریک انصاف (پی ٹی آئی) شاہ محمود قریشی کو رہا کرنے کا حکم دے دیا۔شاہ محمود قریشی کی نظر بندی کے خلاف دائر درخواست پر اسلام آباد ہائی کورٹ کے جسٹس میاں گل حسن اورنگزیب نے سماعت کی۔وکلا کے دلائل سننے کے بعد عدالت نے شاہ محمود قریشی کا 3 ایم پی او کا آرڈر کالعدم قرار دے دیا۔
بعدازاں جسٹس میاں گل حسن اورنگزیب نے شاہ محمود قریشی کو رہا کرنے کا حکم دے دیا۔اسلام آباد ہائی کورٹ نے رہنما پاکستان تحریک انصاف (پی ٹی آئی) شہریار آفریدی کی اہلیہ کو رہا کرنے کا بھی حکم دیا۔شہریار آفریدی کی اہلیہ کی گرفتاری کے خلاف کیس کی اسلام آباد ہائی کورٹ میں سماعت ہوئی۔
وکلا کے دلائل سننے کے بعد عدالت نے شہریار آفریدی کی اہلیہ کو بیان حلفی جمع کرانے کی ہدایت دیتے ہوئے رہا کرنے کا حکم دے دیا۔
لاہور ہائی کورٹ نے پاکستان تحریک انصاف (پی ٹی آئی) کے 70 کارکنوں کی نظر بندی کے احکامات کو کالعدم قرار دیتے ہوئے حکومت کو انہیں فوری رہا کرنے کا حکم دے دیا۔ڈان اخبار کی رپورٹ کے مطابق جسٹس محمد انوارالحق پنوں نے ریمارکس دیے کہ یہ بدقسمتی ہے کہ حکومت سیاسی کارکنوں کو سابقہ کیس میں ضمانت پر رہائی کے فوراً بعد نئے مقدمات میں حراست میں لے رہی ہے۔
جج نے کہا کہ شہریوں کے بنیادی حقوق پر سمجھوتہ نہیں ہونا چاہیے۔انہوں نے حکومت کو ہدایت کی کہ مجرمانہ سرگرمیوں میں ملوث افراد کو حراست میں لینے کے احکامات جاری کرنے کے بجائے ان کے خلاف مقدمات درج کیے جائیں۔
(بشکریہ: ڈان نیوز )