پی ٹی وی ہراسانی کیس : سابق جنرل مینیجر ملتان شفقت عباس کو تنزلی کی سزا ۔۔ ایک سال تک ترقی کے لیے نا اہل

ملتان : پی ٹی وی ملتان مرکز کے سابق جنرل مینجر ملک شفقت عباس کو خاتون اینکر کو ہراساں کرنے پر ایک درجہ تنزلی کی سزا سنادی گئی ہے اور وہ ایک سال تک ترقی کے اہل بھی نہیں ہوں گے۔ تفصیلات کے مطابق چند ماہ پہلے پی ٹی وی ملتان مرکز کے جنرل مینجر کا عہدہ سنبھالنے والے شفقت عباس ملک پر ایک خاتون اینکر نے ہراسانی کا الزام لگایا تھا۔ الزام ثابت ہونے پر پی ٹی وی انتظامیہ نے انہیں ایک سکیل تنزلی کی سزا سنا دی ہے جبکہ انہیں ایک سال تک کسی بھی ترقی کے لئے بھی نااہل قرار دیا گیا ہے۔ ذرائع کے مطابق شفقت عباس ملک اپنی سزا کی معافی اور خاتون اینکر سے صلح کے لئے ملتان کے اہم ترین سیاسی خانوادے کی اہم شخصیت کی سفارش اور ملتان کے بعض صحافیوں کی مدد کے لئے بھی کوششیں کر رہے ہیں جن میں تاحال ان کو کامیابی نہیں ملی۔
واضح ہو کہ شفقت عباس کو اسی ماہ ہراسانی کے الزام میں ان کے عہدے سے معطل کرکے دفتر میں ان کے داخلے پر بھی پابندی عائد کردی گئی تھی ۔ شفقت عباس ملک شعبہ کرنٹ افئیرز کے بھی سربراہ تھے۔ پی ٹی وی کی اینکر ماہ جبیں کھاکھی نے ان پر ہراسانی کاالزام عائد کیا تھا ۔ ماہ جبیں کھاکھی ریڈیو پاکستان ملتان سے وابستہ عابد کھاکھی کی بیٹی ہیں اور گزشتہ کچھ عرصہ سے پی ٹی وی ملتان مرکز سے کرنٹ افئیرز کے ایک روڈ شو کی میزبانی کر رہی تھیں۔ الیکشن 2024 سے پہلے شفقت عباس ملک کی کاوشوں سے ماہ جبیں کھاکھی انتخابات سے متعلق نشریات کے لئے بھی کوارڈینیٹر تعینات کیا گیا تھا۔