ملتان (گردوپیش نیوز)ملتان سمیت پنجاب کے مختلف علاقوں میں شدید آندھی اور طوفان کے باعث متعدد افراد کے ہلاک اور زخمی ہونے کی اطلاعات موصول ہوئی ہیں ۔
ملتان میں شام 6 بجے شدید آندھی اور گرد آلود طوفان نے شہر کو اپنی لپیٹ میں لے لیا۔جس کے باعث اندھیرا چھا گیا۔جبکہ آندھی سے ملتان ریلوے سٹیشن کا مائیکر ویو ٹاور زمین بوس ہو گیا۔ٹاور گرنے سے سدوحسام اور گردونواح کے علاقوں میں بجلی کی فراہمی بھی معطل ہو گئی۔اور ہائی ٹینشن تاریں سڑک پر آن گریں ۔
ٹاور کا کچھ حصہ ریلوے کوارٹرز پر بھی گرا۔ریلوے ترجمان راو تسلیم کے مطابق ٹاور کے گرنے سے کوئی جانی نقصان نہیں ہوا ٹاور سڑک پر گرا اور تمام ریلوے کوارٹرز محفوظ ہیں۔
انہوں نے کہا کہ یہ ایک پرانا ٹاور تھا جس کا ریلوے کے جدید سگنل سسٹم سے کوئی تعلق نہیں ۔اور ٹرینوں کی آمدورفت معمول کے مطابق جاری ہے۔واقع کے بعد ریلوے روڈ پر ہنگامی بنیادوں پر حفاظتی اقدامات کیئے گئے۔ریسکیو1122،پولیس اور ریلوے حکام کی جانب سے کھمبے کو روڈ پر سے ہٹایا جا رہا ہے۔زمیں بوس ہونیوالا مائیکرو ویو ٹاور1983 میں تعمیر کیا گیا تھا۔
