اسلامی نظریاتی کونسل کے سابق چیئرمین 92 سالہ مولانا محمد خان شیرانی نے نکاح کر لیا

اسلام آباد: نام ور عالم دین اور اسلامی نظریاتی کونسل کے سابق چیئرمین مولانا محمد خان شیرانی نے نکاح کر لیا ہے ۔
اے آر وائی نیوز کے مطابق مولانا محمد خان شیرانی کا نکاح گلگت بلتستان سے تعلق رکھنے والی خاتون کے ساتھ انجام پایا ہے، ان کی شادی کی سادہ تقریب اسلام آباد منعقد ہوئی۔
علما و معزز شخصیات کی جانب سے مولانا محمد خان شیرانی کو دلی مبارکباد پیش کی گئی ہے۔
مولانا محمد خان شیرانی نے نکاح کی تصدیق کرتے ہوئے کہا کہ یہ میرا دوسرا نکاح ہے پہلی بیوی کا انتقال ہوگیا تھا۔
علمائے کرام اور مختلف مذہبی شخصیات نے مولانا محمد خان شیرانی کو ازدواجی زندگی کی نئی شروعات پر مبارک باد پیش کی ہے اور ان کے لیے دعاگو ہیں کہ اللہ تعالیٰ انہیں صحت، خوشی اور برکت عطا فرمائے۔
یاد رہے کہ 25 دسمبر 2020 کو پارٹی کی ڈسپلنری کمیٹی کی جانب سے رکنیت منسوخ کرنے سے قبل وہ جمعیت علمائے اسلام (جے یو آئی-ف) کے سرکردہ رہنما تھے۔ یہ فیصلہ کمیٹی کے اراکین آغا ایوب شاہ، مولانا عبدالواسع اور مولانا عبدالحکیم نے متفقہ طور پر کیا تھا۔
اس سے قبل جے یو آئی (ف) خیبرپختونخوا کے سابق سربراہ مولانا گل نصیب نے پارٹی قیادت کو تنقید کا نشانہ بناتے ہوئے مولانا شیرانی کو ایک ایماندار اور اصول پسند آدمی قرار دیا تھا۔
ان کی بے دخلی کے بعد مولانا شیرانی نے جمعیت علمائے اسلام شیرانی (جے یو آئی-شیرانی) کے نام سے ایک الگ دھڑا بنا لیا۔
دو سال بعد انہوں نے پاکستان تحریک انصاف (پی ٹی آئی) کے ساتھ سیاسی اور مذہبی اتحاد کا اعلان کیا۔ یہ پیش رفت مولانا شیرانی اور سابق وزیراعظم عمران خان کے درمیان کے پی ہاؤس اسلام آباد میں ملاقات کے بعد ہوئی تھی۔
ملاقات کے دوران دونوں رہنماؤں نے اسلامو فوبیا سے نمٹنے کے لیے مشترکہ کوششوں اور سیاسی اور مذہبی تعاون کے ذریعے سماجی تفریق کو ختم کرنے پر زور دیا تھا۔