جماعت اسلامی پاکستان کی اپیل پر غزہ کے مظلوم فلسطینیوں سے اظہار یکجہتی کے لیے ملک کے مختلف شہروں میں شٹر ڈاؤن ہڑتال کی گئی۔
جڑواں شہروں اسلام آباد اور راولپنڈی، کراچی، لاہور، پشاور اور کوئٹہ میں آج ہڑتال کی گئی، جبکہ سندھ، پنجاب، خیبرپختونخوا اور بلوچستان کے دیگر علاقوں میں بھی دکانیں اور بازار بند رہے اور گاڑیاں زیادہ تر سڑکوں سے غائب رہیں۔
کراچی میں تاجر تنظیموں کے کئی رہنماؤں نے احتجاج میں شرکت کی جن میں آل کراچی تاجر اتحاد کے چیئرمین عتیق میر، کوآپریٹو مارکیٹ کے جنرل سیکریٹری اسلم خان، پیپر مارکیٹ سید لیاقت علی وغیرہ شامل ہیں۔
کراچی کے علاوہ حیدرآباد، سکھر، لاڑکانہ، میرپورخاص، گھوٹکی، نواب شاہ، ٹھٹھہ، جیکب آباد، کندھ کوٹ اور شکارپور سمیت صوبے کے دیگر شہروں میں ہڑتال کی گئی۔
ادھر، جماعت اسلامی اور دیگر مذہبی جماعتوں کی جانب سے بھی صبح سے شام تک اظہار یکجہتی ریلیاں نکالی گئیں۔
لاڑکانہ میں ریلی کی قیادت جماعت اسلامی سندھ کے امیر کاشف سعید شیخ اور امیر ضلعی ایڈووکیٹ نادر علی کھوسہ نے کی۔
پنجاب میں تاجر برادری کی جانب سے صوبے بھر میں شٹر ڈاؤن ہڑتال کی گئی، لاہور، فیصل آباد، گوجرانوالہ اور جہلم میں تمام کاروباری مراکز اور دکانیں بند رہیں۔
اسی طرح کی ہڑتال کوئٹہ اور بلوچستان کے دیگر حصوں میں بھی کی گئی اور وہاں بازار، دکانیں اور دیگر تجارتی مراکز بند رہے۔
خیبرپختونخوا میں بھی شٹر ڈاؤن ہڑتال کی گئی۔
پشاور کے قصہ خوانی بازار میں جماعت اسلامی کے ضلعی سربراہ بحر اللہ خان ایڈووکیٹ نے احتجاجی ریلی کی قیادت کی۔
جماعت اسلامی کے مولانا عبدالاکبر چترالی نے اسرائیلی جارحیت میں شہید ہونے والے مسلمانوں کے لیے دعا کی اپیل کی۔
صوبے کے ہزارہ، مالاکنڈ، مردان، کوہاٹ، ڈی آئی خان ڈویژن میں بھی ریلیاں نکالی گئیں۔
قبل ازیں، ڈان نیوز کے مطابق امیر جماعت اسلامی حافظ نعیم الرحمٰن نے کہا ہے کہ ملک گیر شٹر ڈاؤن ہڑتال شروع ہو گئی ہے اور آج ملک گیر شٹر ڈاؤن ہڑتال اہل غزہ سے یکجہتی کا اظہار ہوگی۔
حافظ نعیم الرحمٰن نے کہا کہ ہڑتال پوری قوم کی جانب سے ہے، اور قوم فلسطینیوں سے اظہار محبت کرتے ہوئے اسرائیل اور امریکا کی مذمّت کرے گی۔
انہوں نے کہا کہ آج کی ہڑتال امریکا، اسرائیل اور بھارت کی شیطانی تثلیث کے خلاف ہے، اور پاکستانی قوم فلسطینیوں کی نسل کشی برداشت نہیں کر سکتی۔
امیر جماعت اسلامی پاکستان نے کہا کہ یہ ہڑتال مسلم حکمرانوں کے لیے پیغام ہوگا کہ وہ بے حمیتی ترک کریں، اور کھل کر غزہ کے مظلوم فلسطینی عوام کے حق میں کھڑے ہوں۔
