بند ٹوٹنے کا خطرہ : جلال پور پیروالا خالی کرنے کا حکم مساجد میں اعلانات : ہیلی کاپٹر فراہم کر دیے گئے

ملتان : تحسیل جلال پور پیروالا میں بند ٹوٹنے کے خطرے کے بعد شہر خالی کرنے کا حکم دے دیا گیا ہے مساجد میں اعلانات کیے جا رہے ہیں، فوج اور دیگر ادارے حرکت میں آ گئے ہیں ہ ملتان کیپٹل پولیس آفیسر (سی پی او) کا کہنا ہے کہ دریائے چناب کے پانی سے شہر کے قریب بنائے جانے والا بند کسی بھی وقت ٹوٹ سکتا ہے، اس لیے شہری فوری طور پر مکانات خالی کر کے محفوظ مقامات پر منتقل ہو جائیں۔
پولیس کی جانب سے جلالپور پیر والا کی مساجد میں اعلانات کروائے گئے۔
دوسری جانب لوگوں کو ریسکیو کرنے کے لیے 5 تھرمل ٹیکنالوجی ڈرون منگوائے گئے ہیں۔
سی پی او کا کہنا ہے کہ تحصیل جلالپور کے لیے 50 کشتیاں مزید منگوائی گئی ہیں، توقع ہے کہ آج رات پھنسے ہوئے تمام افراد کو محفوظ مقامات تک منتقل کر دیا جائے گا۔
دوسری جانب پروونشل ڈیزاسٹر مینجمنٹ اتھارٹی (پی ڈی ایم اے) پنجاب نے دریائےستلج میں ایک بار پھر اونچے درجے کے سیلاب سے متعلق الرٹ جاری کردیا۔
دریائے ستلج میں ہریکے ڈاؤن اسٹریم اور فیروز پور ڈاؤن اسٹریم میں اونچے درجے کا سیلاب ہے، دریائےستلج پر پانی کے بہاؤ میں مزید اضافہ ہوگا۔
ترجمان پی ڈی ایم اے پنجاب کا مزید کہنا ہے کہ سول انتظامیہ پاک فوج اور دیگر متعلقہ محکمے الرٹ ہیں، شہریوں کے جان و مال کا تحفظ یقینی بنایا جائے گا۔
ایک بیان کے مطابق ڈی جی پی ڈی ایم اے عرفان علی کاٹھیا نے کمشنر و ڈی سی ملتان سے ٹیلیفونک رابطہ کیا ہے۔ عرفان علی کاٹھیا کا کہنا ہے کہ ’فضائی ریسکیو کے لیے ضلعی انتظامیہ کو ہیلی کاپٹرز فراہم کر دیے ہیں۔ فوج، ضلعی انتظامیہ، سول ڈیفنس ریسکیو اور پنجاب پولیس سمیت تمام محکمے الرٹ ہیں۔
پی ڈی ایم اے نے ہدایت دی ہے کہ ’شہریوں کے محفوظ انخلا کو ہر صورت یقینی بنایا جائے۔ مساجد میں اعلانات کے ذریعے شہریوں کو صورتحال کے بارے میں آگاہ کریں۔‘
دریں اثنا سوشل میڈیا پر ایسی ویڈیوز گردش کرتی دیکھی جا سکتی ہیں جن میں جلالپور پیروالا کی مساجد سے یہ اعلانات کیے جا رہے ہیں کہ ’کسی بھی وقت شہر میں پانی داخل ہو سکتا ہے۔‘ ان اعلانات میں شہریوں کو محفوظ مقامات کا رُخ کرنے کی ہدایت دی جا رہی ہے۔
مقامی ذرائع ابلاغ کے مطابق آج ملتان اور اس کے گرد و نواح کے علاقوں میں وقفے وقفے سے بارش ہوئی ہے۔ دریائے چناب کے راستے میں واقع کچھ بند توڑے گئے ہیں اور وہاں درجنوں موضع جات متاثر ہو رہے ہیں۔
( بشکریہ : جیو نیوز ۔۔ بی بی سی )