بیت المال ملتان میں انٹرویوز ، محکمہ کی نااہلی کے باعث بہت سے امیدواروں کو کال لیٹر ہی نہ مل سکا

ملتان :منیجمنٹ اور کوریئر کمپنی کی غفلت کے باعث درجنوں امیدوار پاکستان بیت المال ملتان کے انٹرویوز میں شریک نہ ہو سکے۔ امیدواروں نے دوبارہ انٹرویوز منعقد کرنے کا مطالبہ کر دیا۔
تفصیلات کے مطابق پاکستان بیت المال نے ملتان میں مختلف خالی آسامیوں کے لیے گزشتہ دو روز میں انٹرویوز منعقد کئے۔ جس کے امیدواروں کو کال لیٹر بھیجنے کے لیے ایم اینڈ پی نامی کمپنی کے ساتھ معاہدہ کیا گیا جس نے درجنوں امیدواروں کو لیٹر پہنچائے ہی نہیں اور درجنوں انٹرویو کال لیٹر پاکستان بیت المال ملتان آفس کو واپس کر دیئےجس سے انٹرویوز میں شریک نہیں ہو سکے۔
امیدواروں کے مطابق متعلقہ کوریئر کمپنی کی زیادہ تر علاقوں میں سروس ہی نہیں ہے پھر بھی منیجمنٹ نے ان کے ساتھ معاہدہ کیا۔ انہوں نے مطالبہ کیا ہے انٹرویوز دوبارہ منعقد کرکے شرکت نہ کرسکنے والے افراد کو بھی موقع دیا جائے۔