کورونا : انگلش کرکٹرز کا پی ایس ایل چھوڑنے کا امکان،بنگلہ دیش کا دورہ پاکستان بھی منسوخ : عمران عثمانی

کراچی : پاکستان میں موجود انگلش کرکٹرز نے کورونا وائرس کے خوف سے جلد وطن واپس واپسی پر غور شروع کردیا ہے .پاکستان سپر لیگ ابھی مزید 10 دن تک جاری رہے گی لیکن انگلینڈ کے حاضر سروس کرکٹرز جیسن رائے، ایلکس ہیلز ، معین علی اور جیمز وینس سمیت تمام کھلاڑی وطن واپسی میں عجلت پسندی کا مظاہرہ کر رہے ہیں کراچی میں جمعہ سے شیڈول اگلے تمام میچ خالی گراؤ نڈ میں ہونے ہیں ۔
برطانوی میڈیا کے مطابق ورلڈ کپ ونرز سمیت تمام 15 کرکٹرز ہفتہ کی دوپہر لندن واپس روانہ ہوسکتے ہیں۔
دوسری جانب کورونا وائرس کے سبب بنگلادیش کرکٹ ٹیم کا دورہ پاکستان منسوخ کردیا گیا ہے ۔ بنگلادیش میڈیا کے مطابق بنگلا دیش کرکٹ بورڈ نے کورونا وائرس کے پیش نظر ٹیم کو پاکستان نہ بھیجنے کا فیصلہ کیا ہے جس کے باعث تیسرے مرحلے کے تمام میچز منسوخ ہوگئے ہیں۔واضح رہے کہ بنگلادیش کرکٹ ٹیم کو 29 مارچ کو کراچی پہنچنا تھا، 30 اور 31 مارچ کو پریکٹس سیشن تھا جب کہ یکم اپریل کو واحد ایک روزہ میچ نیشنل اسٹیڈیم کراچی میں کھیلا جانا تھا۔اس کے بعد 2 تا 4 اپریل کو پھر ٹیم پریکٹس سیشن تھا اور 5 تا 9 اپریل آئی سی سی ورلڈ ٹیسٹ چیمپئن شپ میں شامل دوسرا میچ نیشنل اسٹیڈیم میں کھیلا جانا تھا۔
خیال رہے کہ حکومت نے کورونا وائرس کے باعث پاکستان سپر لیگ کے کراچی میں ہونے والے بقیہ تین میچز اور ایک پلے آف بھی بغیر شائقین کرانے کا اعلان کیا ہے۔