ملتان۔ (اے پی پی):ماہرامراض سرطان ڈاکٹرعلی شاذف نے بچوں کے سرطان کے مفت علاج کااعلان کیاہے اوراس سلسلے میں ملتان اورجنوبی پنجاب کے مختلف شہروں میں فری پیڈیاٹرک انکالوجی ٹریٹمنٹ سنٹرز کاآغازکردیاہے ۔
ڈاکٹرعلی شاذف بچوں کے سرطان کے معالج ہیں اورانہوں نے آغاخان ہسپتال کراچی سے اس شعبے میں تربیت حاصل کی ہے ۔علاوہ ازیں وہ شوکت خانم کینسرہسپتال سمیت مختلف ہسپتالوں میں بھی خدمات انجام دے چکے ہیں ۔اے پی پی سے بات چیت کرتے ہوئے انہوں نے کہاکہ ان مراکزکے قیام کابنیادی مقصد یہ ہے کہ اس مرض کی جلد تشخیص ہوسکے تاکہ اس کاشکارہونے والے بچوں کافوری علاج شروع کیاجاسکے۔انہوں نے کہاکہ فری کلینک ملتان میں روزانہ اورجنوبی پنجاب سمیت ملک کے مختلف مقامات پرہراتوارکوکام کرے گا۔انہوں نےکہاکہ ابتدائی طور پرمیں تنہایہ کام شروع کررہاہوں لیکن آنے والے دنوں میں میرے کچھ اوردوست بھی اس کاحصہ بن جائیں گے۔
انہوں نے کہاکہ پاکستان میں ہرسال دس ہزارنئے بچوں میں کینسر کی تشخیص ہوتی ہے اورسالانہ دوہزار بچے اس مرض کے باعث لقمہ اجل بن جاتے ہیں،ضرورت اس بات کی ہے کہ ہمیں اس مرض کے خلاف جنگی بنیادوں پرکام شروع کرناچاہیے ۔
