لاہور : ( ارشد چوہدری سے ) برطانیہ میں گذشتہ دنوں فیک نیوز کے باعث شہریوں کی جانب سے پرتشدد احتجاج اور ہنگامے کیے گئے جس کے بعد ملوث افراد میں سے متعدد کو برطانوی پولیس نے گرفتار کیا جبکہ جبکہ منگل کو مبینہ طور پر فیک نیوز پھیلانے پر لاہور سے بھی ایک شخص کو حراست میں لے کر وفاقی تحقیقاتی ادارے کے حوالے کر دیا گیا ہے۔لاہور سے حراست میں لیے جانے والے پاکستانی شہری کا نام فرحان آصف ہے جو پولیس کے مطابق اس نیوز ویب سائٹ کے لیے کام کرتے ہیں جس نے مبینہ طور پر فیک نیوز پھیلانے میں کردار ادا کیا۔
ڈی آئی جی آپریشنز لاہور پولیس فیصل کامران نے منگل کو اس بارے میں بتایا کہ ’فرحان آصف کو پولیس نے ڈیفنس سے گرفتار کیا ہے،
پولیس افسر نے بتایا کہ ’ان (فرحان فیصل) پر الزام ہے کہ برطانیہ میں تین بچیوں کے قاتل کی شناخت کے حوالے سے خبر چلانے والی پاکستانی ویب سائٹ میں یہ بھی کام کرتے ہیں۔ اس خبر چلانے میں ان کا بھی کردار ہے۔‘
ڈی آئی جی کے مطابق فرحان آصف کو مزید تفتیش کے لیے ایف آئی اے کے حوالےکر دیا گیا ہے، کیونکہ اس طرح کے جرائم کا دائرہ اختیار ایف آئی اے کے پاس ہے۔ مزید تفتیش ایف آئی اے ہی کر رہا ہے۔‘
فرحان آصف نے برطانیہ میں ہونے والے واقعات کے بعد میڈیا سے گفتگو میں کہا تھا کہ ’ہماری جانب سے غلط خبر چلائی گئی جو نہیں چلنی چاہیے تھی۔ لیکن اس معاملے کی تمام تر ذمہ داری ایک چھوٹی سی نیوز ویب سائٹ پر نہیں ڈالی جا سکتی۔‘برطانوی حکام کے مطابق حالیہ دنوں برطانیہ میں ہونے والے مظاہروں کو پرتشدد بنانے میں فیک نیوز نے مرکزی کردار ادا کیا۔ فیک نیوز پھیلانے والے ایک نیوز پلیٹ فارم کو پاکستان کے شہر لاہور سے بھی چلایا جا رہا ہے۔
برطانوی میڈیا کے مطابق ساؤتھ پورٹ کے ایک ڈانس سکول میں گذشتہ ماہ ایک شخص نے حملہ کیا تھا جس کے نتیجے میں تین بچیاں جان سے گئیں جبکہ آٹھ بچیوں سمیت 10 افراد زخمی ہو گئے تھے۔حملہ آور اگرچہ موقع سے فرار ہونے میں کامیاب ہو گیا تھا تاہم بعد میں پولیس نے اسے آلہ قتل سمیت گرفتار کر لیا تھا۔ برطانوی پولیس کے مطابق حملہ آور کی عمر 17 سال ہے جس کے باعث اس کی شناخت ظاہر نہیں کی جا سکتی۔
اس واقعے کے بعد برطانیہ میں یہ افواہ پھیلی کہ حملہ آور مسلمان تھا اور کئی ویب سائٹس نے ملزم کی شناخت ظاہر کرنے کا بھی دعویٰ کیا تھا۔جس کے بعد برطانیہ بھر میں مسلمان پناہ گزینوں کے خلاف مظاہرے شروع ہو گئے اور جھڑپوں میں پولیس اہلکاروں سمیت درجنوں لوگ زخمی ہو گئے تھے۔
ساؤتھ پورٹ حملے کے بعد شروع ہونے والے مظاہروں کو سوشل میڈیا پر پھیلائی جانے والی جھوٹی خبروں سے شہہ ملی اور فیک نیوز پھیلانے میں ایک نیوز ویب سائٹ ’چینل تھری ناؤ‘ کا بھی ہاتھ تھا۔تحقیقات کے دوران اس نیوز ویب سائٹ کے لیے کام کرنے والے لوگوں کو تلاش کیا گیا جن کا تعلق دنیا کے مختلف ممالک سے ہے۔
