دہشت گردی کے خاتمے میں علماء کرام کا کردار بہت اہم ہے : پروفیسر ڈاکٹر طحہ قریشی

ملتان ۔۔۔ ممبر برٹش ایمپائر پروفیسر ڈاکٹر طحہ قریشی نے کہا ہے کہ دہشت گردی کے خاتمے میں علماء کرام کا بہت بڑا کردار ہے۔ حالیہ ایران امریکہ جنگ میں دشمن قوتوں نے پاکستان میں ایک مرتبہ پھر دہشت گردی کرنے اور شعیہ سنی فسادات کرانے کی بھرپور کوشش کی مگر علماء کرام نے نہایت تدبر اور معاملہ فہمی سے دشمن کی اس مذموم کارروائی کو ناکام بنا دیا۔ ان خیالات کا اظہار انہوں نے معروف سماجی رہنما و ماہر اقبالیات انجینئر ممتاز احمد خان کی رہائش گاہ پر اپنے اعزاز میں ایک تقریب کے دوران کیا- تقریب سے خطاب کرتے ہوئے ڈاکٹر طحہ قریشی نے اپنی معروف تصنیف Peace and Reconciliation کے حوالے سے گفتگو کی جس میں انہوں نے اتحاد بین المسلیمینُ کی آرزو اور مغربی دنیا میں اسلامک فوبیا کے بڑھتے ہوئے رجحانات کی فکر اور بین المذہبی ہم آہنگی کے لیے اپنے شبانہ روز قلمی اور فکری جہاد کا ذکر کیا۔
تصنیف میں امت مسلمہ اور پاکستانیوں کے مسائل پر سیر حاصل بحث کی گئی ہے قرانی تعلیمات اور اسوہ حسنہ نبی کریم پر عمل پیرا ہونے کی بھی ہدایت کی گئی ہے۔تقریب کے دوسرے حصے میں انجینئر ممتاز احمد خان نے اپنی خود نوشت سوانح ” ممتاز نامہ” سے شرکاء تقریب کو نوازا –

ممتاز نامہ انجینئر ممتاز احمد خان کی زندگی بھر کی خوبصورت یاداشتوں ہر مشتمل ایک خوبصورت کتاب ہےجو گرد و پیش پبلی کیشنز نے شائع کی ہے ۔ انجینئر ممتاز احمد خان نے کہا کہ اگر میں یہ کتاب نہ لکھتا تو یہ بہت بڑا جرم ہوتا۔ اس کتاب کو لکھنے سے میں نے خود ایک نئے ممتاز احمد خان کو جانا ہے۔ قاری کیلئے اس کتاب میں تاریخی واقعات کے ساتھ دلچسپی کا بہت مواد شامل ہے۔
تقریب میں مختلف شعبہ ہائے زندگی سے متعلق احباب نے شرکت کی جن میں انجینئر عبدالحکیم، رضی الدین رضی، گل نسرین، اشفاق احمد خان ترین، خواجہ سلیم رضا آصف۔سلیم قیصر، اکرم خان، علی سخنور، اللہ بخش، ڈاکٹر محمد اکرم کلیار،حنیف چوہان، عامر شہزاد صدیقی، ڈاکٹر عبدالبصیر، ملک امجد سعید تھہیم،ناصر ظہیر، سرفراز اعوان و دیگر شریک تھے۔
( بشکریہ : سوسائیٹی نیوز )