ہاں یہی وقت تھا جب میں پچھلے برس
روز سنتا تھا ماں تیرے دکھ درد سب
کبھی دھیمی صدا اور کبھی ہچکیاں، سسکیاں
پر میں سنتا تھا چپ چاپ تیری کہانی جو بچپن ،لڑکپن میں بھی
سن چکا تھا کبھی
رات کے دوبجے ہیں کہانی سنا
ماں مجھے سارے دکھ پھر زبانی سنا
کس قدر تھا کٹھن زندگی کا سفر
کیسے تنہا کٹی تھی جوانی سنا
ماں مجھے نیند آتی نہیں رات بھر
ماں کہانی سنا
مہرباں ماں! مجھ پہ کر مہربانی سنا
اپنے بچپن کی باتیں وہ سکھیوں کے قصے
جو تو نے سنائے تھے سب یاد ہیں
آج لیکن یہ لگتا ہے کب یاد ہیں؟
یاد ہے مجھ کو گرمی کی راتوں میں تیری وہ آواز ،
جس میں سکوں تھا کہ گرمی کی شدت بھی رہتی نہیں تھی
وہ چولہا ،صراحی ،گھڑونجی ،وہ چھیکا ، دنداسہ
نظر میں سمایا ہے ہر اک اثاثہ
تو چپ کیوں ہے ماں
تو نے چپ چاپ کتنے ہی دکھ تھے سہے
کیسے کاٹے تھے تنہائی کے سب سَمے
عین ممکن ہے تجھ کونہ اب یاد ہو
پر مجھے یاد ہے
وہ کہانی جو تو نے سنائی تھی ہجرت کی مجھ کو کبھی
کیسے چھوڑا تھا بچپن میں اپنا چمن
کیسے پہنچا تھا وہ قافلہ والٹن
میں نے تیری زبانی وہ سب کچھ سنا
جنوری کی ٹھٹھرتی ہوئی وہ گھڑی بھی مجھے یاد ہے
اک جنازہ تھا رکھا ہوا صحن میں
بین اور سسکیاں
بیوگی کے سفر کا وہ آغاز تھا
زندگی کا نیا ایک انداز تھا
دو بجے دوپہر کے وہ لمحات تھے اور کہانی کا بھی اک نیا موڑ تھا
رات کے دو بجے کروٹیں کروٹیں
مجھ پہ کر مہربانی کہانی سنا
وہ ابد تک نہ سو پائے گا اب کبھی
کہہ رہا ہے تجھے آج تیرا رضی
اس پہ کر مہربانی کہانی سنا
ہو لحد پر تری گلفشانی سنا
مہرباں ماں تری مہربانی سنا
آج پھر سے مجھے وہ کہانی سنا
