پاکستان اب ایک اور مارشل لا کا متحمل نہیں ہوسکتا، جمہوریت بہترین انتقام ہے: بلاول بھٹو

چیئرمین پیپلز پارٹی بلاول بھٹو کاکہنا ہے کہ بے نظیر بھٹو کی زندگی پاکستان کا مستقبل بہتر بنانے کیلئے صرف ہوئی، والدہ نے بدلہ لینا نہیں سکھایا،اسی لیے کہتا ہوں جمہوریت بہترین انتقام ہے۔
بلاول بھٹو نے آکسفورڈ یونیورسٹی میں لیکچر دیتے ہوئے کہا کہ عورتوں پر عائد پابندیوں کے باوجود بے نظیر بھٹو ملک کی وزیراعظم بنیں، آج پنجاب کی وزیر اعلیٰ بھی ایک خاتون ہیں۔
چیئرمین پیپلز پارٹی کا کہنا تھا کہ پاکستان اب ایک اور مارشل لا کا متحمل نہیں ہوسکتا، پاکستان کا مستقبل آئین کی بالادستی، آزاد عدلیہ اور صحافت سے وابستہ ہے۔
بلاول نے کہا کہ والدہ نے بدلہ لینا نہیں سکھایا،اسی لیے کہتا ہوں جمہوریت بہترین انتقام ہے، بے نظیر بھٹو کی زندگی پاکستان کا مستقبل بہتر بنانے کیلئے صرف ہوئی۔ پاکستان کے عوام بہتر مستقبل کا مطالبہ کرنے کیلئے حق بجانب ہیں۔
آکسفورڈ یونیورسٹی کے صدراسرار خان کی سوال جواب کی نشست میں بلاول بھٹو نے گفتگو میں کہا کہ نیب ڈریکونین لا ہے ہم اس کے آج بھی مخالف ہیں، سندھ میں پیپلز پارٹی نے صحت کی بنیادی سہولتوں کی فراہمی کو بہتر بنایا ہے۔
بلاول بھٹو کا مزید کہنا تھا کہ بلوچستان میں سکیورٹی صورت حال قابل تشویش ہے، پاکستان کے ایٹمی اثاثے اپنی حفاظت کیلئے ہیں۔
(بشکریہ:جیونیوز)