لاہور:پنجاب پولیس نے میانوالی کے تھانہ چاپری پر خوارجی دہشت گردوں کا حملہ ناکام بناتے ہوئے 4 دہشت گردوں کو ہلاک کردیا۔
پنجاب پولیس کے ترجمان کی جانب سے جاری بیان کے مطابق تھانہ چاپری میانوالی پر خوارجی دہشت گردوں نے اچانک حملہ کیا تاہم پنجاب پولیس میانوالی نے دہشت گردوں کا حملہ ناکام بنا دیا اور 4 دہشت گردوں کو ہلاک کردیا۔
بیان میں کہا گیا کہ خیبرپختونخوا (کے پی) سے متصل پنجاب کی بین الصوبائی سرحد پر عیسی خیل سرکل کے تھانہ چاپری پر دہشت گرد حملہ آور ہوئے،20 سے زائد خوارجی دہشت گردوں نے بھاری اسلحے کے ساتھ تھانہ پر اچانک حملہ کیا۔ترجمان پنجاب پولیس کا کہنا تھا کہ پولیس اور خوارجی دہشت گردوں کے درمیان شدید فائرنگ کا تبادلہ ہوا، دہشت گردوں نے تھانہ کی عمارت پر راکٹ لانچرز برسائے اور ہینڈ گرنیڈز بھی پھینکے تاہم تھانہ چاپری کا تمام عملہ محفوظ رہا۔
انہوں نے بتایا کہ دہشت گردوں کے حملے میں دو پولیس اہلکار معمولی زخمی ہوگئے ہیں اور پولیس کی جوابی فائرنگ سے دو خوارجی دہشت گرد ہلاک ہو گئے۔ترجمان پنجاب پولیس کے مطابق واقعے کے بعد ڈی پی او میانوالی اختر فاروق، سینئر پولیس افسران موقع پر پہنچ گئے اور آئی جی پنجاب ڈاکٹرعثمان انور نے دہشت گردوں کا حملہ ناکام بنانے پر میانوالی پولیس کو شاباش دی۔
آئی جی پنجاب نے کہا کہ پنجاب پولیس ہمہ وقت الرٹ ہے، دہشت گردوں کے ناپاک عزائم کو خاک میں ملا کر دم لیں گے اور پنجاب پولیس امن دشمن عناصر کا اسی طرح جواں مردی سے مقابلہ کرتی رہے گی۔
(بشکریہ:ایکسپریس نیوز)
