ملتان : جامعہ خیر المدارس ملتان میں طالب علم کی مبینہ خودکشی کی اطلاع ہے ، عینی شاہدین کے مطابق طالب علم کی نعش پنکھے سے پنکھے سے لٹکی ہوئی تھی ۔ پولیس تھانہ دہلی گیٹ نے نعش میں قبضے میں لے کر پوسٹ مارٹم کے لیے نشتر ہسپتال بھیج دی ہے ۔ ایک طالب علم نے نام نہ ظاہر کرنے کی شرط پر بتایا کہ طالب علم کا تعلق بلوچستان سے تھا اور وہ کچھ دنوں سے پریشان تھا ۔
معلوم ہوا ہے کہ اس کے گلے میں ربڑ کے پائپ سے پھندہ لگایا گیا ۔ نعش دس گھنٹے پرانی ہے تاہم اس واقعے کا سہ پہر تین بجے علم ہوا ۔ واقعہ سے کچھ دیر قبل جامعہ کے مہتمم نام ور عالم دین قاری حنیف جالندھری ائیر پورٹ روانہ ہوئے تھے لیکن یہ خبر ملتے ہی وہ واپس آ گئے ۔خودکشی کی خبر جنگل کی آگ کی طرح علاقے میں پھیل گئی اور پولیس ریسکیو حکام اور ضلعی انتظامیہ کے افسران موقع پر پہنچ گئے ۔ قاری حنیف جالندھری نے اس موقع پر بات کرتے ہوئے کہا کہ ہم خود اس بارے میں تحقیقات کر رہے ہیں جس کے بعد اصل صورت حال سے سب کو آگاہ کر دیا جائے گا ۔
