لاہور: تحریک انصاف کے وائس چیئرمین شاہ محمود اور سابق سیکرٹری جنرل 9 مئی کے واقعات کی تفتیش کے سلسلے میں جے آئی ٹی کے سامنے پیش ہوگئے۔
پولیس کے مطابق شاہ محمود قریشی اور اسد عمر سے 9 مئی سے متعلق سوالات کیے گئے جس پر دونوں رہنماؤں نے ڈی آئی جی انویسٹی گیشن کو بیان ریکارڈ کروا دیا۔
پولیس کے مطابق دونوں رہنماؤں کے سامنے 9 مئی کے واقعات کے ڈیجیٹل اور فرانزک شواہد رکھے گئے، سربراہ جے آئی ٹی نے کچھ سوالات کیے اور پوچھا کہ آپ کا کردار کیا رہا جس کے جواب میں شاہ محمودنے کہا کہ ہمارا نہ کوئی کردار تھا نہ ہی ہم ملوث ہیں، تفتیش کے سوالات اور نکات کو میڈیا پر لانا مناسب نہیں۔
9 مئی واقعات: شاہ محمود اور اسد عمر کو شامل تفتیش ہونے کا حکم
اس موقع پر اسد عمر نے کہا کہ پولیس نے 9 مئی سے متعلق پوچھا اور جتنی ہمارے پاس معلومات تھیں ہم نے بتادیں۔
واضح رہے کہ لاہور کی انسداد دہشتگردی کی عدالت نے شاہ محمود اور اسد عمر کو شامل تفتیش ہونے کا حکم دیا تھا اوردونوں کی عبوری ضمانتوں میں بھی توسیع کی ہے۔
عمران خان جی ایچ کیو حملے سمیت مزید مقدمات میں نامزد
پاکستان تحریک انصاف (پی ٹی آئی) کے چیئرمین عمران خان کو 9 مئی کے واقعات میں مزید مقدمات میں نامزد کردیا گیا۔
ذرائع کے مطابق چیئرمین پی ٹی آئی کو دہشتگردی ایکٹ کے تحت 6 مقدمات میں نامزد کیاگیا ہے، ان کےخلاف 3 مقدمات 9 اور 3 دس مئی کو درج کیے گئے۔
ذرائع نے بتایا کہ چیئرمین پی ٹی آئی کو فیصل آباد اور راولپنڈی میں درج دو دو مقدمات میں نامزد کیاگیا، گوجرانوالہ اور میانوالی میں بھی درج ایک ایک مقدمے نامزد کیا گیا۔
ذرائع کا کہنا ہے کہ عمران خان فیصل آباد میں تھانہ سول لائنز اور سمن آباد، راولپنڈی میں تھانہ آر اے بازار اور نیوٹاؤن جبکہ میانوالی میں تھانہ سٹی اور گوجرانوالہ میں تھانہ کینٹ میں درج مقدمات میں نامزد کیا گیا۔
(بشکریہ:جیو نیوز)
