جیل بھرو تحریک کے ساتھ ملتان میں بھی مذاق : عامر ڈوگر گرفتاری دیے بغیر واپس چلے گئے

دیگر شہروں کی طرح ملتان میں بھی جیل بھرو تحریک مذاق بنی رہی ۔ملتان میں پاکستان تحریک انصاف (پی ٹی آئی) کی جیل بھرو تحریک کیلئے کارکن سابق ایم این اے ملک عامر ڈوگر کے گھر جمع ہوئے تاہم گرفتاری دیے بغیر روانہ ہوگئے۔
ملتان میں گرفتاریوں کیلئے نواں شہر چوک پہنچنے والے پاکستان تحریک انصاف کے کارکن اور رہنما بھی گرفتاریاں دیے بغیر واپس روانہ ہوگئے۔
آج ملتان سے جیل بھرو تحریک کیلئے گرفتاریاں دینے کا دن تھا لیکن گزشتہ روز پشاور کی طرح ملتان میں بھی رہنما و کارکن جمع ہوئے تاہم گرفتاریاں دیے بغیر روانہ ہوگئے۔
رہنماؤں نے نواں شہر چوک پر احتجاج کیا،کارکنوں سے خطاب کیا، خطاب کے بعد پی ٹی آئی کے سٹی صدر ملک عدنان ڈوگر نے کارکنوں کو گھر جانے کا کہہ دیا۔
خیال رہے کہ تحریک انصاف نے 22 فروری سے جیل بھرو تحریک شروع کی تھی اور پہلے مرحلے میں لاہور سے شاہ محمود قریشی، اسد عمر، اعظم سواتی و دیگر رہنماؤں و کارکنوں نے گرفتاری دی تھی۔
پنڈی سے فیاض الحسن چوہان اور ذلفی بخاری نے گرفتاری دی تھی۔ پی ٹی آئی فوری نئے انتخابات کا مطالبہ کر رہی ہے جبکہ حکومت کا کہنا ہے کہ عام انتخابات اپنے وقت پر ہوں گے۔