ملتان: نگران صوبائی وزیر صحت پنجاب ڈاکٹر جاوید اکرم نے کہا ہے کہ ملتان کے ہسپتالوں کو طبی خودکفیل بنائیں گے اور ہسپتالوں کو جدید طبی آلات اور مشینری فراہم کررہے ہیں کابینہ کے پہلے اجلاس میں صحت کے شعبہ کے لئے اڑھائی ارب روپے کی منظوری دی گئی جبکہ نشترکے لئے 350 ملین روپے منظور کئے گئے ہیں۔
یہ بات انہوں نے نشتر ہسپتال اور میڈیکل یونیورسٹی کے دورہ کے دوران میڈیا سے گفتگو کرتے ہوئے کہی۔ نگران صوبائی وزیر صحت ڈاکٹر جاوید اکرم نے کہا کہ جلد ہی ملتان جدید سہولیات سے آراستہ جنوبی پنجاب کا طبی مرکز ہو گا ہسپتالوں میں ادویات کی مفت فراہمی یقینی بنارہے ہیں ۔ ہسپتالوں کو بڑے پیمانے پر ادویات فراہم کریں گے تمام ہسپتالوں میں فارمیسیاں قائم کریں گے ۔ایک سوال کے جواب میں انہوں نے کہا کہ پنجاب میں صحت کارڈ بند نہیں کیا گیا بلکہ اس میں مزید بہتری لائیں گے۔ڈاکٹر جاوید اکرم نے کہا کہ نشتر ہسپتال پارکنگ مسئلہ کے حل کے لیے پارکنگ پلازہ تعمیر کریں گے اتائیوں کی حوصلہ شکنی کے لئے کارروائی کر رہے ہیں ۔
انہوں نے کہا کہ نشتر ہسپتال ملتان میں منشیات کے عادی نوجوانوں کے علاج کا آغاز کر دیا گیا ہے۔ایک سوال کے جواب میں وزیر صحت پنجاب نے کہا کہ شفاف ، آزادانہ اور محفوظ الیکشن ہماری ترجیح ہے ۔ انہوں نے کہا کہ کابینہ کے آئندہ اجلاس میں کسانوں کے مسائل حل کریں گے۔ زرعی ملک میں اراضی نہیں کسان ہمارا سرمایہ ہیں زرعی اصلاحات میں عمدہ کھاد ،بیج ،زرعی ادویات اور زرعی اجناس کی مارکیٹنگ بارے فیصلے ہوں گے۔دریں اثنا نگران صوبائی وزیر صحت ڈاکٹر جاوید اکرم نے ملتان میں 150 بستروں پر مشتمل نشتر انسٹیٹیوٹ آف اپتھلمالوجی اینڈ الائیڈ ہیلتھ وژن سائنسز کا افتتاح کر دیا ۔منصوبے کا اعلان گزشتہ سال کیا گیا تھا،کڈنی سنٹر سے متصل ڈی ایچ کیو ہسپتال کی عمارت میں اب 150 بستروں پر مشتمل انسٹیٹیوٹ آف آپتھلمالوجی اینڈ الائیڈ ویژن سائنسز کے لئے باقاعدہ مختص کر دیا گیا جس پر اسی سال کام شروع کر دیا جائے گا، اس حوالے سے نشتر میڈیکل کالج و ہسپتال کے پرنسپل و شعبہ امراض چشم کے سربراہ پروفیسر ڈاکٹر راشد قمر راو نے بتایا کہ 1660 ملین سے تیار ہونے والا یونٹ ملتان سمیت جنوبی پنجاب کے 11 اضلاع کے 35 ملین رہائشی مستفید ہوں گے انہوں نے بتایا کہ آنکھوں کے اس علیحدہ یونٹ کے لئے مرحوم وائس چانسلر نشترپروفیسر ڈاکٹر مصطفی کمال پاشا موجودہ وائس چانسلر نشتر پروفیسر ڈاکٹر رانا الطاف سیکرٹری سپیشلائزڈ ہیلتھ کئیر اینڈ میڈیکل ایجوکیشن ڈاکٹر احمد جاوید قاضی اور سپیشل سیکرٹری سپیشلائزڈ ہیلتھ کئیر واجد علی شاہ نے نہایت اہم کردار ادا کیا، پروفیسر ڈاکٹر راشد قمر راؤ کا کہنا تھا کہ 1 ارب 50 کروڑ کے اس منصوبے پر جلد از جلد کام مکمل کیا جائے گا۔ پروفیسر ڈاکٹر راشد قمر راؤ کا کہنا تھا کہ اب کارنیا عطیہ کرنے کیلئے مقامی افراد کو آگاہی فراہم کی جائیگی تاکہ بعد از مرگ ان کے عطیہ کئے گئے کارنیا سے وہ مریض جن کی زندگی اندھیروں میں کٹ رہی ہے اس میں رنگ بھرے جا سکیں۔ قبل ازیں نگران صوبائی وزیر صحت ڈاکٹر جاوید اکرم نے نشتر برن یونٹ اور انسٹیٹیوٹ آف کارڈیالوجی کا بھی تفصیلی دورہ کیا اور مریضوں کو فراہم کی جانے والی سہولیات کا جائزہ لیا۔
