ملتان یکم نومبر(اے پی پی )نامور ماہرقانون اور سابق چیف جسٹس لاہورہائی کورٹ جسٹس (ر)قاسم خان نے کہا ہے کہ شاعر اورادیب معاشرے کی آوازہوتے ہیں اور اپنی شاعری کے ذریعے اپنے عہد کی تاریخ مرتب کرتے ہیں۔ ممتاز العیشی نے بھی ایک شاعر کی حیثیت سے اپنے عہدکے آشوب کو تاریخ کاحصہ بنادیا۔ایوب دور میں ان کی مزاحمتی نظمیں لوگوں میں نیا جوش وولولہ پیدا کرتی تھیں۔ان خیالات کااظہارانہوں نے سخن ورفورم کے زیراہتمام ملتان ٹی ہاؤس میں نامور شاعر استادالاساتذہ ممتازالعیشی کے یوم ولادت کے موقع پر خصوصی تقریب میں مہمان خصوصی کی حیثیت سے خطاب کے دوران کیا۔تقریب کی صدارت نامور دانشور،ماہرتعلیم اور ماہرلسانیات ڈاکٹر اسد اریب نے کی۔ مہمان اعزاز ڈاکٹر محمد امین اور سینئر قانون دان مرزا عزیز اکبر بیگ تھے۔
اس موقع پرخطاب کرتے ہوئے ڈاکٹر اسد اریب نے کہاکہ ممتاز العیشی ایک محبت کرنے والے انسان تھے۔ان کے دم سے ملتان کی مجلسی زندگی آباد تھی ۔ ڈاکٹر محمد امین نے کہا کہ ممتاز العیشی کو وہ مقام نہیں دیاگیا جس کے وہ حق دارتھے۔انہیں فن شاعری پر مکمل عبور حاصل تھا۔ انہوں نے کئی نسلوں کی تربیت کی۔انجینئر ممتاز احمد خان نے کہا کہ ممتاز العیشی سے ملاقات کے بعد مجھے کلام اقبال کے نئے پہلوؤں سے آشنائی ہوئی۔ تقریب کے میزبان ممتاز العیشی کے صاحبزادے وسیم ممتاز نے کہا کہ والد صاحب کی وجہ سے مجھے بچپن سے ہی نامور شخصیات سے ملاقات کااعزازحاصل ہوا۔ ان کابلا کاحافظہ تھا۔ ان کی وفات کے بعد ان کی کتاب” میں ابھی زندہ ہوں“ کی اشاعت کے وقت ہمیں معلوم ہوا کہ ان کے پاس تو بیاض ہی نہیں تھی۔ ریذیڈنٹ ڈائریکٹر پنجاب آرٹس کونسل ملتان سلیم قیصر نے کہاکہ وہ میرے استاد تھے۔ مجھے ان سے بہت کچھ سیکھنے کوملا۔ سابق جج ڈرگ کورٹ حافظ اللہ دتہ کاشف بوسن نے کہاکہ ممتاز العیشی ایک سچے عاشق رسول تھے۔ فاروق خان سعیدی نے کہا کہ ممتاز العیشی نے اس شہر میں شعروادب کی جو خدمت کی اسے کبھی فراموش نہیں کیا جاسکے گا۔
شاکر حسین شاکراوررضی الدین رضی نے کہاکہ ممتاز العیشی ملتان کی ایسی آوازتھے جو دنیا بھر میں سنائی دیتی تھی۔اس موقع پر اکمل وینس ،شیخ ارشد محمود، یوسف بلوچ، فہیم ممتاز، زین ممتازاور دیگر مقررین نے بھی اظہارخیال کیا۔ تقریب میں صدر ڈسٹرکٹ بار وسیم خان بابر، جنرل سیکرٹری ارشد طاہرمیئو، سابق صدر ڈسٹرکٹ بار ملتان اطہر شاہ بخاری، قمررضا شہزاد، بشیر انصاری، سردارخضر خان بلوچ، ڈاکٹر تسلیم قریشی، محمد ارشد مغل، ڈائریکٹر ایف آئی اے مجتبیٰ ظفر سیال،اسرارچوہدری، قیصر عباس صابر، ساجد ملک، ارشد بخاری،اکبر ہاشمی، مامون طاہر رانا، محمد علی رضوی، کامران اشفاق، خواجہ حبیب، فاروق سائرسمیت زندگی کے مختلف شعبوں سے تعلق رکھنے والے افراد کی بڑی تعداد نے شرکت کی۔تقریب کے اختتام پر انجینئر ممتاز احمد خان نے ممتاز العیشی کا کلام سازوآواز کے ساتھ پیش کیا۔
