جنوبی پنجاب میں طوفان باد و باراں ، مواصلاتی نظام درہم برہم : 110 فیڈر ٹرپ کر گئے

ملتان۔ ملتان سمیت جنوبی پنجاب میں طوفان بادو باراں سےکئی شہروں میں مواصلاتی نظام درہم برہم ہو گیا ۔
میپکو ترجمان کے مطابق تیز آندھی اور بارش سے میپکو ریجن کے 110 فیڈرز ٹرپ کر گئے۔ ملتان، مظفر گڑھ، ڈی جی خان، خانیوال اور دیگر علاقوں میں بجلی فراہمی متاثر ہوئی ، چیف ایگزیکٹو آفیسر میپکو انجینئر اکرام الحق نے متاثرہ علاقوں کی بجلی بحال کرنے کی ہدایت کردی ہے بارش کا سلسلہ رکنے کے بعد بجلی بحالی کی سرگرمیاں شروع کی جائیں گی ۔ لائن سٹاف کو ٹی اینڈ پی اور سیفٹی پالیسی پر عملدرآمد کرتے ہوئے بجلی بحال کرنے اور آپریشنل افسران کو بجلی بحالی کے کاموں کی نگرانی کی ہدایت کی گئی ہے ۔
ادھر ملتان کے مختلف علاقوں میں بارش کے دوران واسا میں ہائی الرٹ جاری کر کے تمام سیوریج، ڈسپوزل اسٹیشنز ڈویژنوں میں ہنگامی حالت کا اعلان کر دیا گیا ۔تمام سیوریج ،ڈسپوزل سٹیشنوں کے افسران اور سٹاف فوری طور پر ،فیلڈمیں طلب کر لیا گیا ہے اورتمام روڈز ،میٹرو روٹ سے ہنگامی بنیادوں پر بارش کا پانی نکالنے کی ہدایت کوششیں جاری ہیں ۔ تمام ڈسپوزل سٹیشنوں کو فل کپیسٹی پر چلانے کا حکم جاری کیا گیا ہے تاہم بیشتر علاقوں میں لوڈ شیڈنگ کی وجہ سے امور متاثر ہو رہے ہیں‌ ایم ڈی واسا ناصر اقبال کی ہدایت ہے کہ لوڈ شیڈنگ کی صورت میں ڈسپوزل اسٹیشنز کو جنریٹرز پر چلایا جائے،انہوں نے کہا کہ بارش کے پانی کی نکاسی تک تمام افسران فیلڈ میں اپنی حاضری کو یقینی بنائیں،