یوم تکبیر :ایٹمی دھماکوں کی سالگرہ ۔۔ اب معاشی دھماکہ کریں گے ۔۔ نواز شریف

اسلام آباد : ملک بھر میں ایٹمی دھماکوں کی 19 ویں سالگرہ آج منائی جا رہی ہے ۔ اس موقع پر ملک بھر میں خصوصی تقریبات منعقد ہوں گی۔ یوم تکبیر کے موقع پر اپنے پیغام میں وزیر اعظم محمد نواز شریف نے کہا ہے کہ 28مئی پاکستانی تاریخ کا ایک ناقابلِ فراموش دن ہے،اُس دن ملک کا دفاع ناقابلِ تسخیر بنا دیاگیا جب پاکستان ایک ایٹمی قوت کے تعارف کے ساتھ دنیاکے نقشے پر نمودار ہوا،’یومِ تکبیر‘ جہاں پاکستانی قوم کی بے مثال جرات اور بہادری کی علامت ہے وہاں پاکستان کے دشمنوں اور بد خواہوں کے لیے بھی یہ پیغام ہے کہ پاکستان کے خلاف جارحیت کا مظاہرہ کرنے والوں کاانجام عبرت ناک ہوگا۔ انہوں نے کہا آج سے19 سال پہلے جب مسلم لیگ کی منتخب حکومت نے یہ فیصلہ کیا تو اسے طرح طرح کے چیلنجوں کا سامنا تھا,ایک طرف اقتصادی پابندیوں کی دھمکیاں دی جا رہی تھیں اور دوسری طرف اس اقدام کو ناقابلِ معافی جرم کے طور پر پیش کیا جا رہا تھا,مسلم لیگ کی قیادت نے اللہ تعالیٰ کے بھروسے اور عوام کی تائید کے بل بو تے پر ان چیلنجوں کو قبول کیا اور پاکستان کے وقار کاعلم سر بلند رکھا,اس موقع پرقوم ان تمام شخصیات کی بھی شکر گزار ہے جنہوں نے مختلف مراحل پر جرات کا مظاہرہ کیا اور پاکستان کو ایٹمی قوت بنانے میں اپنا کردار ادا کیا۔ وزیر اعظم محمد نواز شریف کا کہنا تھا کہ ’’یومِ تکبیر ‘‘انہوں نے کہا کہ ہم نے 19 سال پہلے پاکستان کا دفاع ناقابلِ تسخیر بنایا تھا،آج اسی جذبے اور وژن کے ساتھ پاکستان کی معیشت کو بھی مضبوط اور مستحکم بنایا جا رہا ہے،